Acid amshia tetsür tepsetba ken o nung Ankur Lal tasüba agi merenshitsü

Mumbai, September 08 (Agencies): 2013 küm Delhi nung tetsür ka tenüng agi, Preeti Rathi dak acid inokja tepsetba ken o nung arishi küm 26 Ankur Lal Panwar aitsüba sülen Brihostibarnü Mumbai nung aliba special women’s court-i la tasüba agi merenshitsü obendang agütsüogo.
Special Judge, AS Shende-i iba obendangji agüja liasü.
Bodhbarnü prosecution-i, tangari tatishitsü agitsüsa Panwar nem temerenshi tulu agütsütsüla, kechiyong acid amshia amakbaji tetsürtem anema benshiba ozüng alema inyakba lir, iba denji külemi Panwar-i idangyongjisa acid amshia amakba ka masü saka jelia sentong yanglur amakba lir, ta ashi.
Yashi Special Public Prosecutor, Ujjwal Nikam-i, iba ken o nung tasüba temerenshi agütsütsü tetemsü, ta ashi. Ano külen Panwar atema okatsür, Apeksha Vora-i paa atema  taochi meshija, pa ano lanur dang, aser pa kijai par kibong mesür, ta ashi.
“Pa nem temerenshi ajema agütsüra aser jail nung mapang tatsüka sülen chiokra tangar tetsürtema kümzüka mali,” ta Nikam-i ashi.
Mumbai nung aliba Defence hospital nung inyaktsü atema Delhi nungi arula nurse, Preeti dak Panwar-i acid toklokja  tepseta liasü.
Mongolbarnü Panwar ji IPC Section 302 (nisung tepsetba) aser Section 326 B (acid amshia amakba) nung aija liasü.
2013 küm Narela, New Delhi nung alir Rathi ji arishi küm 24 dang liasü, aser la acid densema chisemba ajanga temang nung timtem jenti adoka asü.
May 02, 2013 nü Panwar-i la dak acid tokloktsüba sülen la Mumbai nung aliba nija hospital ka nung June 01, 2013 nü asü.
Panwar aser Rathi naji Delhi nung aliba Bhakra Beas Management Board Colony nung kiyonger liasü.