Act East atema NE ji tongtibang: Dr Jitendra

Silchar (Assam), November 08 (Agencies): Mongolbarnü Union Minister of State (Independent Charge) for Development of North Eastern Region (DoNER), MoS PMO, Personnel, Public Grievances, Pensions, Atomic Energy & Space, Dr Jitendra Singh-i, ‘Act East’ atema Northeast ya tongtibang lir, aser tarutsü nung India-i Myanmar, Bangladesh aser Bhutan densema anüdoklen aliba linüktem den shishilembatsüsa kümra, iba nungji takok angutsüji North East ainba aser terenlok dak keta lir, ta metetdaktsü.
ICSSR, New Delhi aser Assam University-i Silchar, Assam nung ayongzükba “Economic Dependence on North-Eastern States of India & its bordering nations” International Seminar nung tongti tesemdanger o jembidang Singh-i, Northeast nung potential tulu lir, ajisüaka tamalen sorkartemi tongtibangsüa temulung magtsüba ajanga itemji explore süa mali, ta ashi.
Paisa, Ato kilonser Narendra Modi kübok tan aliba sorkari iba tesem nem togtingba agütsüba dang masü saka anüdoklen arrtsülen rongsenkettsüng aser yimtenren nung rangloker inyaker, ta ashi.
Dr Jitendra Singh-i, India-Bangladesh-i ali melenteptsü tezüngzüktep agiba ajanga linük ana tsüngda senzüsembang melemela süteter, iba mapa ya küm 40 tejeklen agir alitsüla, saka ibaji sendoka yutsü, ta ashi.
“Iba denji kasa Agartala nungi Bangladesh railway lenmang yangluba densema tesem nung railway network ulushiba ajanga ainlen senzüba mapang kanga ajemtsü aser linük ana naprong nem lenmang lapoktsü,” ta paisa shisem.
Singh-i, Northeast nung tsünütetba aonsotsü chiyungtsütemji Anüdoklen aliba linüktemi agitsü, aser ibaji tejangja. Ibayongji Ato kilonseri organic farming den original products ajungshir, koba ajanga Northeast tesem ajak rongsenkettsüng jenjang ajungketba dang masü saka arrtsülen aliba linüktem den tajangzük kaa shishilembatettsü, ta ashi.
Union minister-isa, taruba küm 10 ji Northeast kümtem asütsü aser “Act East” policy ji tang aliba sorkari inyaktetba takok tulutiba asütsü, ta ashi.
Iba sentong nungsa Sam Houston State University, USA nungi Prof. H.K. Nath, Shah Jalal University, Bangladesh nungi Prof. Kamal Ahmed Choudhury aser Assam University Vice-Chancellor, Prof. Dilip Chandra Nath nungeria jembi.