‘Act of Kindness’ telok küm asem jungogo

Dimapur, Rongchii 14 (TYO): DBIdl, Don Bosco Hr. Sec. School Campus, River Belt Colony, Dimapur nung Rongchii (April) 14, 2018 nü Act of Kindness (AoK) telok tenteter küm asem ajungba den külemi sangro kaket aser music video sayaba sentong ka agiogo.
Iba sentong nung tongti tesemdanger ka ama jembidang, sorkar ketdangsüba mapa nung tetsüng ajemoker sentong balala nung dena aruba rongnung, AoK kümsem benjong sentong ya tongtipangtiba lir, ta Higher & Technical Education Minister, Temjen Imna Along Longkumer-i ashi.
2015 küm nungi tenzüka AoK temi Dimapur jila nung mapa balala inyakba indang video screening ka sayur jembiba mapang, “AoK ajanga inyakba ya mapa balaka masü, ibai inyaktsü tim mapa inyakba lir. Aria bilemba mapa inyaktsü asoshi tetsüng aser teka arakzütsüla,” ta Higher & Technical Education Minister-i ashi. AoK teloki parnok tekolok, tashi aser tanüla ajunga bendanga agütsür nüburtem ajangzüktsü mechi inyakba asoshi Minister-i pelaba shisem.
“Tanüasüng lanurtem aika lenmang tai nung jajar, saka iba telok (AoK) ajanga nüburtem rongnung sentong tasen ka tenzüka shidakba mapa inyaktsü metsübur,” ta pai ashi.
“Kidangi meyipa oang aser mejangba nungi saakang, nü ket nung tera dang liaka ibaji agi tangar yariang, tangar atema tajung bilemjang aser mapa tajung inyakang…Takok tulu ji mapa tila ka nungi dang tenzüker,” ta Minister Imna Along-isa ajungshi.
Küm asem ajungba nüngtem nung AoK indang ‘The Bards of Magnus Opus’ sangro kaket ka kasa sentong nung Higher & Technical Education Minister-i sayatsü aser Imsu Manen-i yangluba ‘Best in me’ music video ka iba sentong nungsa Dimapur Municipal Cooperation (DMC) Administrator, Moa Sangtam-i totushi tejaoker ka ama sayatsü. AoK-i ayongzükba ‘Magnus Opus’ sentong nung state nungi sangro mejemer 26-i mejemba sangrotem iba kaket nung lir.
“Naga nunger dak sempet peria lir, saka item sempet ajungkettsü sabang peria monguteter. Saka AoK ajanga item sempet aketer lanurtem ajungkettsü asoshi akokba nung yariba asoshi pelar,” ta Moa Sangtam-i ashi.
Iba sentong ya Bobita Rai-i ketdangsüa agi aser NEISSR nungi Dr. Fr C P Anto-i Tsüngrem temoatsü meshia sarasademer tenzük. AoK ketdangser Lenti Aier-i Act of Kindness indang inyakyim tatsü agi telok den lemsatep. Kasa sentong nung Limatula Jamir, Liviho Swu (Naga Hindi Voice Season 3 winner) aser Imsu Manen nungeri ken aten aser Mangimen Ao Baptist Arogo nungi Youth Director, Alemwati Aier-i sentong tembanga sarasadem.