Activist 3 nem 2015 World’s Children’s Prize agütsür

2015 World’s Children’s Prize agizüker 3 (Abelen nungi tarensena) Cambodia tsür, Phymean Noun, Restorative Justice Office nung Co-Director, Javir Stauring aser 2014 Nobel Peace sempet agizüksang, India nunger Kailash Satyarthi nunger indang noksa yangi angur. (Stockholm, October 14)

 Stockholm, October 14 (Agencies): Nübur temeten asoshi nokdakba Cambodia tsür, Phymean Noun nem 2015 World’s Children’s Prize tanü Bodbar nü agütsüogo.

Cambodia yimtiba, Phnom Penh nung tentetba jana indokdak balala nung alir tila tanurtem yariba nüngtem nung Phymean nem dollar sen 50,000 senpet aketba World’s Children’s Prize ya agütsü.

Phymean-i lar United Nations (UN) mapa toktsür külen 2004 küm People Improvement Organization (PIO) telok tentet aser tanübo lar teloki jana indokdak alir tanur 240 tashi nem angati agi kaketshisatsü agütsüba den külemi, parnok mesütetba osang bushiteta lir.

Ano, United States kübok Los Angeles yimti nung Catholic Archdiocese kübok tentetba Restorative Justice Office nung Co-Director, Javir Stauring aser Pakistan tsürla, Malala Yousafzai den aroki 2014 Nobel Peace sempet agizüksang, India nunger Kailash Satyarthi na nema World’s Children’s Honoary Award tanü agütsüba osang jangjaogo.

Javir aser Kailash na nema senpet sen 50,000 agütsüogo aser iba senji tena tsüngda sadanga agitsü.

Ozüng alema aibelenba tanur taküm tajungba küma melenshidaktsütsüsa parnok merenshidaktsütsü nükjidong nung Javier-i tila tanurtem puoka ayuba tepuokdak balala semdangba den külemi, pai yimsüsür aser ozüng yanglurtem den mapang shia ajurua nungdakba onük benokba ajanga temzüng ozüng tajungba küma melenshia yanglushiba osang bushiteta lir.

Ano, tila tanurtem nem kaketshisatsü agütsütsü aser parnok nem tashiyim agi mapa meinyakdaktsütsü asoshi nokdaksang, Kailash-i 1980 küm Bachpan Bachao Andolan telok tentetba sülen tanü tashi nung par teloki linük 144 nungi tila tanur 83,000 dak tema nem temeten agütsüba osang jangjaogo.

Par asem nem 2015 World’s Children’s Prize-ji Sweden kübok Stockholm yimti nung sentong tajung ka agia tanü agüja liasü.

Kasa sentong nung Sweden chubatsür, Queen Silvia adenba osang jangjaogo.

Taliban teloki kasettsü merangla, Yousafzai-i 2014 World’s Children’s Prize agizük aser lai senpet senji UN-i Gaza nung tenteta ketdang asüba school yanglushitsü maparen nung amshitsü asoshi tenla liasü.