Actor Al Molinaro arishi küm 96 nung süogo

October 31, 2015: ‘Happy Days’ film nung shilem agisang, actor Al Molinaro, Hokolbarnü Glendale, California nung arishi küm 96 nung süogo, ta par jabaso Michael Molinaro-i metetdaktsü.
Molinaro-i pa akümlidang ‘Happy Days’ film nung Big Al Delvecchio ama shilem agiba ajanga nüburtemi kanga jangja meteta aküm. Pa ya tasü nung lung aliba ajanga Verdugo Hills Hospital nung shiranga asü. Pa kanga tain asüba agi tasü meindoktet.
Happy Days film ya Milwaukee, Wisconsin nung 1950’s mapang lanurtem otsü dak ajemdaker yangluba lir aser iba film ya ABC network ajanga 1974 nungi 1984 tashi sayua liasü. Iba film indang episode 140 tashi nung Molinaro-i shilem agi.
Pai tebütsü tanabula, Betty Molinaro aser pa mezüng kinüngtsü den sosemba jabaso, Michael den semchir asem toktsür asü.
Molinaro “Buddy Holly” music video nunga 1994 küm shilem agia liasü aser iba video kanga takok angubaji onok asoshi meyimlaba takok ka liasü, ta Michael-i ashi.
Iba dak alia Molinaro-i “Freaky Friday” aser “Joanie Loves Chachi” film tem nunga shilem agi lir.
Al Molinaro ya Kenosha, Wisconsin nung aso.