Actor Catherine Coulson arishi küm 71 nung süogo

September 29, 2015: America nung serial drama television series ‘Twin Peaks’ nung shilem agila, Catherine Coulson, cancer agi shiranga arishi küm 71 nung süogo.
David Lynch-i yangluba TV drama nung ajaki Log Lady ta meteta alila, shiba tenüng Margaret Lanterman liasü, lai iba serial nung teti mitsüktsü süngtem ka benloker shilem agia liasü. Iba otsü nung la iba süngtem den telung tesendaktep ka liasü aser ibaji ajanga lai tesüiba nung atalokba den tarütsü nung atakloktsü alibatem meteta akümer. Anungji iba teyari ajanga serial otsü nung nisung tepsetba osang jila nung alirtem den lemsatepteta liasü. Iba serial ya tetsübutsüka saka ano menütsü asoshia tajung lir.
La nem akümtsübu agütsüba mapang, Lynch-i, “Tanü kü tembartem tajungtiba rongnung ka, Catherine Coulson kü dak nungi pilaogo. Lai teti tembartem asoshi bilemja aser parnok meima benshia liasü. La lemzükba shilem, mapa aser lar kibong lai kanga meim. Lai mapa agi kodanga malak aser asayamenü meimba nisung ka liasü. La menü marem aser lai tangara menüdakjasa liasü. Iba den külemi tamang nunga kanga tashi tait liasü,” ta sangdong ka ajanga metetdaktsü.
La indang agent, Mary Dangerfield-i, “La ya ‘Log Lady’ liasü aser la asüba ajanga temulung kanga raksar, la ya aika asoshi kanga nüngdakba tetsür ka liasü,” ta ashi.
1990 küm tangokba ‘Twin Peaks’ indang character ya 1977 küm Lynch-i mezüng buba yangluba feature film, ‘Eraserhead’ nung la assistant director ama inyakdang puratetba lir.
Star Trek II: The Wrath of Khan aser John Cassavetes’ The Killing of a Chinese Bookie fim tem tangok danga lai camera amshia liasü.
Iba drama yanglushir 2017 nung sayatsü aliba nung laa shilem agitsü liasü.
Lai, “Ni iba mapa asoshi kanga yongyar aser Lynch dang yimti tiyong dak alaka tanga tesem nung tangoktsü shilem dang lemzükjang ta shiogo,” ta yaküm Wall Street Journal dang shia liasü.