Actor tain, Saeed Jaffrey alima nungi pilaogo

November 16, 2015: Actor tain, Saeed Jaffrey shibai Bollywood film aser English film naprongla nung temenungratsü aketba shilem tajung aika agia aruogo, pa arishi küm 86 nung alima nungi pilaogo.

Interational film nunga takok nguteter mezüng India actor tem rongnung Saeed Jaffrey densema lir, aser pai ‘Shatranj Ke Khilari’, ‘Gandhi’ aser ‘My Beautiful Laundrette’ ama film tem nung shilem kanga junga agiogo.

Actor Jaffery asüba osangji par kinünger Shaheen Agarwal-i Facebook ajanga Deobar nü metetdakja liasü.

“Tanü Jaffrey’er puto süia ogo. Saeed Jaffrey-i par adianutem aser aianu nunger den denogo aser kotaker tebu tepima nung tatem maka peladar,” ta Agarwal-i ashi.

Director Shekhar Kapur-i, Jaggery ji taochi aketba nisung ka liasü, ta ashi.

“Tatem salem Saeed. Masoom film nung nü den külemi ni film nung mezüng ajemok. Nü dak temeim aketba aser tejangraba aliba mamateter,” ta pai twitter ajanga ashi.

Jaffrey mezüng All India Radio nung inyakba sülen America-i oa Catholic University of America nung ‘drama’ zünga liasü.

Pa asüba osang angashia Ato kilonser Narendra Modi-i, “Saeed Jaffrey ya sempet aika aketba actor ka liasü aser pa dak aketba sempettemji teti bilemtettsü. Pa alima nungi pilaba asüko lemsateper,” ta ashi.

Acress Manisha Koirala-ia, “Actor tajung tanü alima nungi pilaogo. RIP Saeed Jaffrey” ta ashi.

Iba dak alia India nunger kentener aser film industry nungi aikati asür nem akhüm agüja asüko osang lemsatepogo.