Actor-tem nokdangba ajanga kiralongrar nokdangtetti süra sorkari yamaji inyakang:Varun

Mumbai, September 27 (Agencies): India nung Pakistan nunger actor-tem shilem magidaktsütsü asoshi Maharashtra Navnirman Sena (MNS)-i tenokdangba benokba indang jembiba mapang, “Sorkari actor-tem nokdangba ajanga kiralongraba nokdangtettsü amai bilemra, yamaji inyakang,” ta actor Varun Dhawan-i ashi.

“Ni India sorkari latetba ozüng nung anidaker nisung ka lir. Sorkari kechi tajung ta lemteta inyakdir nia yangji adentsü. Actor-tem nokdangba ajanga kiralongraba nokdangtetti süra, aji inyaktsü parnok mulung aser yamaji inyaktsüla. Ajisüaka, iba atema sorkari telemtetba agitsü nüngdak,” ta Night Life Convention Award sentong nung shilem agidang Dhawan-i ashi.

September 18, 2016 nü Uri nung lendong ataloka, India miktar züngsem 18 asüba sülen  Pakistan nunger film aser TV sentong nung shilem agir ajak gondha 48 tsüngda nung India toktsütsü osang MNS-i taoba Hokolbar nü sangoktsü.

“Kü mulung ajak agi asür mitkartem atema aria bilemtsür,” ta iba lendong indang jembidang Dhawan-isa ashi.

Dhawan-i tang tesüsa Alia Bhatt den “Badrinath Ki Dulhania” film tetangokdak lir.