Actress Trisha, Jallikattu pusemertemi aitsü

Chennai, January 14 (Agencies): South Indian film actress Trisha, PETA animal welfare organisation ajungkettsüba nung shilem agiba atema Hokolbarnü la dang Tamil Nadu nung tetangokdak film metangokteti Jallikattu pusemer lanurtemi sota ayu.
Trisha ya People for Ethical Treatment of Animals (PETA) telok den mapang talangka nungi sendakteba lir . Parnok telok yagi mapang talangka nungi Jallikattu anema nokdaker. Jallikattu ya akhidang nungi asaya aruba asaya ka lir, koba nung nashipungchi azüoktsü meranger. Parnoki maneni nisungtem shirnoki ozüng alema iba asaya pusemer parnoka aputsü asoshi akhanger.
Longkak aitertemi dang Sivaganga district nung tetangokdak film Garjanai metangokdaktsüi nokdanga ayu, aser Trisha la jenoka aliba tesem nungi adokang ta ayimten. Police aruba sülenang la kümzüka anir oa.
Trisha-i tatok menangzük tashi, aser PETA nung pusema shilem agiba nungi manen tashi, la Tamil Nadu nung noksa metangokdaktsütsü ta longkak aitertemi ashi. Maneni Jallikattu pusemertemi PETA anendaktsütsü asoshi akang.
Supreme court-i Jallikattu asaya nokdangtsüba ajanga sobaliba metsünga reta benshirtem aser iba asaya pusemertem mepelar.