Actress Zareen Khan-i Salman Khan den kibong kümner

Mumbai, August 22 (Agencies): Taoba mapang nung Bollywood star, Salman Khan-i Sangeeta Bijlani, Somy Ali, Faria Alam, Aishwarya Rai aser Katrina Kaif nunger den medema liasü, iba dak alia pa Bollywood nung tetsür aika den tesendaktep junga lir.
Tesüiba mapang nung pa kibong akümtsü ta olulu kanga jembia aruogo, ajisüaka tangbo nisung aikati pai kibong makümtsü südi, ta bilemer.
Ajisüaka tawa actress Zareen Khan-i, lai Salman Khan meimer aser pa den kibong kümner, ta shiogo.
Zareen Khan-i mezüng Bollywood nung ajemoka shilem agiba film ji ‘Veer’ liasü, iba film nung Salman Khan tenati tongti shilem agi.
Tawa interview ka nung tasüngdangba ka langzüdang arishi küm 32, Zareen Khan-i, Salman Khan (arishi küm 53) tena kibong akümtsü ta olulu prokdaktsüner, ta ashi.
Ano tasüngdangba ka langzüdang lai, Salman Khan, Karan Singh Grover aser Gautam Rode nunger rongnung ka shimtsü, ta asayamenüa ashi. Laisa, Gautam kibong kümogo, Karan-a kibong kümogo, Salman dang anünga lir, anungji Salman shimtsü, ta ashi.
Tang Zareen-i Telugu film industry nung tang mezüng shilem agidar, aser Salman Khan-a Sonakshi Sinha den külemi ‘Dabangg 3’ film nung shilem agidar.
Salman Khan-isa Alia Bhatt den külemi Sanjay Leela Bhansali-i direct asüba ‘Inshallah’ film nung shilem agitsü.