Adam Levine-i pa meimer tila tanur ka den ajurutep

New York, October 18 (Agencies) : Tila tanur kati Maroon 5 kentener Adam Levine meimer ta ashiba video ka kanga bulua prokshiba sülen tanutsüla jagi lai meimsang den ajurutepogo.
Tawa tu Adam Levine kibong kümogo ta osang angashiba sülen arishi küm 3 tain Mila nüktzü alua ajeb.
“Masü. Masü, Oja pa kibong maküm” ta tanutsülai jeba ashidang tetsüi video agi aser iba video ya nisung million 5-i reprangogo.
Iba osang angashia The Ellen Show nung Mila jaok aser sensaksemdang lai Maroon 5 kentener meimba ashi.
Mila-i Ellen DeGeneres dang ashiba agi, lai mapang talangka nungi Adam den kibong akümtsü jangrar aser paji la tetong aser lai pa kanga meimer.
Tanutsülai Adam Levine kanga meimer ta Ellen-i angateta lai Mila nem Adam indang sübotsü ka agütsü aser iba sülen tanutsüla dang meshii dang lir Adam anir aru.
Adam-i tanutsüla nem golab naro ka bener arua agütsü aser la dak azüit.
“Ni temulung raksa. Mila indang video ji kanga dang temeimtsüka liasü aser ni meteta alirtem ajaki kü dangi iba video yok. Kübotsü aser kütsü natia video ji kanga dang temeimtsüka ta ashi” ta Adam-i Ellen den sensaksemdang ashi.
Ajisüaka, Ellen indang sentong nung Mila-i tepela nung o mejembiteti aküm aser la kanga dang nüma metangteti tetsü dak dang azüiter amen.
Adam Levine ya alima nung ‘sexiest man alive’ ta tenüng jaloktsüogo aser taküm July nung Brazil nunger model Behati Prinsloo den kibong aküm.