ADC Mon M.A. Shihab-i anentsüh aludak semdang

Dimapur, September 22 (TYO) : September 21, 2015 nü Addl. Deputy Commissioner, M.A. Shihab, IAS den EAC, Mon nati Tanlao Ward Mon nung anentsüh aluba tesem semdang aser idakji takoksa ajururtem, ward council züngsemtem aser ketdangpurtem den ajurutepa sensaksem.
Iba tesem nung anentsüh ajanga ki 12 kanga mejungi raksatsüogo aser ano ki 23 raksatsü ana nung dang lir. Ano, Tanlao ward nung aliba Edith Douglas School Colony tesem anenzüka aoer.
Deobarnü iba colony nung alirtem kanga sarongsachitep aser parnoki ki anenzüka bener aoertem khu belenba nung yaritep. Ki anenzüka aoertem ajak pei pei kinünger den jenoka lir.
Nübortem lendong nungi jenbua lidaktsütsü atema anentsüh aludak anasa aliba power line disconnect süogo kechiyong anentsüh jagi light post tema tashimait kümdaktsüogo. Tanlao ward nung alirtem joko küm ana-asemka khuret ajurua arur kechiyong 2012 nungi iba tesem nung ali anenoka aitsü tenzük.
Anentsüh ajanga Edith Douglas School kanga mejungi raksatsüogo aser iba ya ajanga class junga magiteter. 2012 nung anentsüh agi school tejenba raksatsüba sülen tang khen atema yangluba school ki nung class agia arur.
ADC Mon M.A. Shihab-i Tanlao kiyonger tem dang kanga jeretpera aser mita alitsü ayongzük. Paisa anentsüh ajanga takoksa ajurur kibong 12 nem sen teyari agütsü.
Tanlao ward nung Ward council aser public-i District Administration dang pelaba metetdaktsü aser takoksa ajurur kibong talila kümra relief camp lapoktsü atema tebilemba lemsatep.