ADC Pfutsero-i ayonga senden amen

Dimapur, June 17 (TYO): Pfutsero sub division kübok ketdangsertem posting lemzüktsüba sülen ADC Pfutsero, Zeneikhonuo Vimero-i ayongzüka June 16, 2017 nü ADC office Conference Hall nung 9th Assam Rifles, DEF, 5th NAP C. COY, SBI, Cooperative Bank, post office, DIET densema sub divisional office tem nungi tekolakpurtem coordination senden ka amen.
Iba senden nung ADC-i ketdangsertem dang, pei mapa lemzüktsüba tesem nung alitsü aser mapa kanga nendaka inyaktsü ayongzüka liasü.
Laisa ketdangsrtem dang longjemer inyaktsü aser department balala tsüngda amalitepa inyaktsü ayongzük.
Iba senden nung adentsü jaokba ama adenba asoshi lai ketdangsertem dang pelaba lemsatepba den külemi parnok dang maneni amalitepa inyaktsü mepishi.
Iba senden nung tongtibang onük aika den tebilemtsü onük balala nung o lemtepa liasü.