Addis Ababa nung African Union Summit amener

Addis Ababa, January 30 (Agencies): Zimbabwe Tir & African Union (AU) Chairman, Robert Mugabe-i Ethiopia yimtiba, Addis Ababa nung African Union Summit tanü, Honibar nü lapoktsüogo.
Africa nung nübur temeten anema inyakba onük tongtipangsüa benoktsü nükjidong nung ayongba AU Summit nung Africa nung tentetba linük lenirtemi shilem agitsü tenzüka lir.
Tan senden nung shilem agirtemi Burundi linük nung tensa tajungba kümdaktsütsü nükjidong nung teloktep AU mitkar züngsem 5000 shi Burundi-i yoktsü sentong lir.
Ajisüaka, par linük nung tetsüng ajemokba bendang linük mitkar ajunga den tongpang raratsü renema aliba olen ka Burundi sorkari amokmerena metetdakja lir.
Burundi Tir, Pierre Nkurunziza-i linük temzüng alema inyaktsü lemteta, Tir menden tasembenren abentsü asoshi Tir election nung candidate ka ama toktepa shilem agitsü osang ka yaküm,  2015 küm sangoktsüba sülen par Burundi nung tensa mejungi akümtsü tenzük.
Pai lemtetba ama, Pierre-i election nung takok ngua Burundi Tir menden tasembenren abentsü jenjang tang ngua lir.
Ajisüaka, Pierre-i aniba Burundi sorkari osangbener amokmerena merenshiba aser yimtenren ken o nung ajemdaker sorkar anemertemi ayongba longkak aitsü maparen ajunga songtema ayutsü tenzükba osang bushiteta lir.
“Tai maketba nüburtem shiruru ama tepsetbaji linük lenirtem indang khuret lir,” ta shia, tan senden nung shilem agisang, United Nations (UN) Secretary General, Ban Ki-moon-ia Burundi tensa tekaraba mapang nung tajungba kümdaktsütsü tajungshiba olen ka metetdaktsüogo.
Tan senden nung Africa Tir, Jacob Zuma aser Egypt Tir, Abdel Fattah el-Sissi natia shilem agiba osang jangjaogo.