Addl. Drugs Controller R.F. Lotha den asüpila sentong agi

Dimapur, October 12 (TYO) : October 3, 2015 nü Additional Drugs Controller Nagaland, R.F. Lotha temang manemi akümba sülen Oking Hospital Kohima nung anepalua arur October 11 nikongtsütsü pa alima nungi pilaogo.
Hombarnü Para Medical Colony Kohima nung asür R.F. Lotha’er kidang pa den asüpila sentong agi. Asür R.F. Lotha-i kinungtsü den jabaso ana aser jala ana toktsür alima nung pilaogo.
Pa den asüpila sentong nung Health & Family Welfare Department, Commissioner & Secretary H&FW, M. Patton-i o jembidang ashiba agi, asür R.F. Lotha ji kanga dang tenendak, takotet aser bendanga agüja inyakba ketdangser ka liasü.
“R.F. Lotha lenisüba kübok Drug Control line maparen tang tenzükli pa alima nungi pila aobaji department atema takoksa ulura lir” ta Patton-isa ashi.
Asüpila sentong nung Dr. T.M. Lotha, Er. Levi Rengma, taoba State Chaplain Rev. Yankey Patton, Colony Panchayat, Nagaland Medical Council, Lotha Gazetted Officers Association, Kohima Lotha Hoho, Lotha Gazetted Officers Union Kohima, Good Shepherd Ministry, Indian Red Cross Society, Nagaland State Branch, Dr. John Lotha, Outreach Facilitators Group aser tanga telok aikati asür nem tetushi agüja o jembi.
Asür R.F. Lotha nem akhümtsüba agütsüba sayua Nagaland Medical Dealers Association-i tanü nikongtsütsü 1:00 ako nungi 6:00 ako tashi dokan shibang.
Asür R.F. Lotha ya February 11, 1959 nü aso aser pa ya Naga nungertem rongnung B. Pharma angur mezüngbuba liasü.
1985 nung pa Drug Inspector ka ama mezüng sorkar mapa inyaktsü tenzük aser 1994 nung Deputy Drugs Controller jenjang nung ajungket. Iba sülen October 2015 nung pa maneni Additional Drugs Controller jenjangi ajungketer iba mapa teinyakdak nung asü.
Pai IRCSN nunga patron, managing committee member aser honorary treasurer mapa balala inyakogo aser 1992-1997 nung Kohima Lotha Baptist Church nung Deacon cum Treasurer inyak.
Kohima nung asür R.F. Lotha den asüpila sentong agiba sülen pa mang par tasoyim Pongidong nung aremtsü atema bener ao.