Adele-i Super Bowl half-time nung shilem agitsü memelung

August 15, 2016: Nüngtugu kentener, Adele-i, America nung 2017 Super Bowl half-time show nung la dang shilem agitsü asüngdang, ajisüaka la menangzük, ta ashi.
Los Angeles kenten sentong nung lai lokti dang iba osang lemsatepa liasü.
Kentenba sabang nungi Adele-i lokti dang, “Tamasa, ni Super Bowl nung shilem magitsü. Iba tetezü iba show ji music indang masü. Ni metsüngsangteter mesüra iba denji mesükba meinyakteter. Parnoki kanga aochia kü dang asüngdang, saka ni ma ta ashi,” ta metetdaktsü.
Ajisüaka National Football League (NFL) aser sponsor Pepsi-ibo iba sentong nung Adele dang shilem agitsü masüngdang, ta shiogo.
NFL aser Pepsi-i külem sangdong ka ajanga Billboard website nung, “NFL aser Pepsi ji Adele kanga sapurtem lir. Pepsi Super Bowl Halftime Show atema onoki kentener aika den jembiogo. Ajisüaka tanbo onoki Adele mesüra shinga danga masüngdang,” ta metetdaktsü.
“Houston atema show ka nung onoki ranglokdar aser ibaji mapang tetemsü nung onoki metetdaktsütsü,” ta kasa sangdong nung shia lir.
Adele-isa, la mashisa aser Super Bowl half time show nung lai ibaji sangdongtsü ta olulu jembibaji tiyazü lir, ta ashi.
Lai lokti dang, “Ni mashisa süra iba tashi ainlen mesenzütettsü,” ta ashi.
Tamalen Super Bowl half-time show nung Madonna, Rolling Stones aser Prince densema kentener aikati shilem agia aruogo.
Yaküm iba sentong nung Beyonce, Chris Martin aser Bruno Mars nungeri shilem agia liasü.
Super Bowl half-time show nung advertise asürtemi second 30 atema US sen million 5 tashi agütsür.