Adele’er ’25’ kensep million 1 tashi yoka otsü tasen yanglushir

New York, December 08 (Agencies): Nüngtugu kentener, Adele-i tesüsa adokba kensep, ’25’ maneni million 1 shi US nung taoba hopta tsüngda ayokba sülen ’25’ kensep Billboard 200 albums tarensen nung temaba jenjang ngua lir.
’25’ kensep million 3.48 tashi hopta ka nung yokshia hopta ka nung kensep timba ayokba otsü yangluba sülen US nung maneni ’25’ kensep million 1.16 tashi tanabuba hopta nunga yokshia ’25’ kensep-i otsü tasen yangluogo ta Nielsen Music-ia metetdaktsüogo.
“Ozü teloki taoba mapang, 1991 küm nungi tenzüka kensep ayokba osang bushiba sülen ’25’ kensep kisüng hopta shia million ka ka yokshiba kensep kümogo,” ta par teloki ashi.
Online ajanga download süa kensep ayokba osang züngdanger, Digital Songs chart nunga Adele’er ’25’ kensep temaba jenjang nung aliba osang bushitetogo.
Lar single ken, ‘Hello’-a 232,000 ben tashi online nung download süa yokshiba osang jangjaogo.
Justin Bieber’er ‘Purpose’ kensep 211,00 tashi yokshia, iba kensepi ’25’ kensep sülen anidaka, Billboard 200 tarensen nung tanabuba jenjang anguba osanga angazükogo.
Kensep ana sülenji anidaka, A cappella kentener telok, Pentatonix’er ‘That’s Christmas To Me’ kensep; Britain nung tentetba tebur kentener telok, One Direction’er ‘Made in the A.M.’ kensep aser Taylor Swift-i 2014 küm adokba ‘1989’ kensepi Billboard 200 tarensen nung 3 buba, 4 buba aser 5 buba jenjang ngua lir.