Aden Angh onoki tepset: IS

Aden, December 06 (Agencies): Aden province, Yemen nung Deobarnü Angh den pa indang bodyguard trok mena aliba gari nung tapoktsü ka poloktsü, ta ketdangsertemi ashi.
Iba nisung tepsetba mapa ya onoki inyak ta Islamic State (IS)-i metetdaktsüogo.
Aden nung tan ang tasen shimba Angh, Major General Jafar Mohammed Saad ya Tawahi district ajanga mapai aoba mapang pokset, ta sepai ketdangser kati ashi.
Islamic State-i twitter ajanga sangdong ka nung iba mapa ya parnoki inyak ta shiogo, ta Xinhua news agency-i metetdaktsü. IS teloki ano iba amala mesükba lendong aika agütsütsü ta Yemen sorkar amokmerenogo.
Ita ishika tsüngda nung tang anendaktsür aliba Yemen sorkar ketdangpur dak, tan agi tanaben iba ama lendong agütsür.
October ita nunga Aden nungsa Yemen Ato Kilonser Khaled Bahah aser par yimsusurtem aliba hotel ka IS teloki ajungmesoa tapoktsü amshia amak. Tia ka Bahah den yimsüsürtem ajak kecha meyirui taküm jentet.
Tang rongsen kettsüng tsütsü kanga tia tamajung kati ia aliba Arab linük, Yemen ya IS telok kübok aliba Al Qaeda telungpuri amokbanger lir.
Taoba mapang linük Tir Ali Abdullash Saleh-i aniba, Shia Houthi telok aser linük sorkar na March ita nungi rara adokba sülen linük nung security jenjang kanga mejungi aküm.