Adhoc tesayurtemi lumia lungkak aiter

Kohima, Aami (June) 29 (TYO): All Nagaland Adhoc Teachers Group (ANATG)-2015 batch-i tanü nungi mapang telatet makai lumia lungkak aittsü tenzükogo.
State sorkar aser Department of School Education nungi telangzüba tajung manguba atema parnoki lumitsü tenzük.
Aami (June) 18 nungi ANATG-2015 batch-i Directorate of School Education kima nung mener lungkak aittsü tenzük.
December 2012 tashi nung shimba adhoc tesayur 1166 regularize süjang ta parnoki akhanger.
Principal Secretary to Government of Nagaland dena education department ketdangsertem aiben ajurutepa iba tebilemtsü koktettsü atema sendentem menogo saka telemtetba ka magiteti süogo, ta ANATG-2015 batch otongdar, Bendang Ozukum-i ashi.
Yashi sorkar tenüng nung PWD Minister Tongpang Ozukum-i aniba State Cabinet committee aser adhoc tesayurtem senden amen saka telemtetba magitet. Iba senden nung School Education Advisor, MLA K T Sukhalu aser Principal Secretary naprong aden, ta paisa ashi.
Sorkar aser department-i zübazüba toktsüba atema adhoc tesayurtemi tanü nungi lumia lungkak aittsüsa aküm, ta otongdarisa shisem.
ANATG-2015 ketdangpurtemi ashiba agi, service regularization masü tashi parnoki lumia lungkak aittsü.
“District shia nungi adhoc tesayur 70 shi kati lumia lungkak aitter aser sorkar telangzüba tajung magütsü tashi lungkak aittsü” ta Bendang-isa metetdaktsü.
Lumia lungkak aitba mezüng anogo nung tetsür tesayur ka süchia ao aser la mozü kidangia anir oa anepaluba sülen tajungba kümogo ta osang angazüker.
ANATG-2015 batch-isa School Education nung Principal Director dangi tezüluba ka agütsüogo aser iba nung taoba mapang agütsüba shiditem ajak ajangteta okadak Interlocutory Application ka benoktsü aser mapang meindoki parnok khurettem agizüka reprangshimtsü takhangba agüja lir.
Iba tezüluba nung ANATG-2015 Batch tir Ruguotsolie aser convenor Temsuchiba Aier nati sign süka lir aser parnoki sorkar dang ANATG-2015 Batch atema one-time special office memorandum balaka agütsütsü atema takhangba agütsüogo.
August 30, 2011 nü P&AR department-i tetuyuba agütsüba nung ajemdaker parnok mapa regularize süjang ta parnokisa akhanger.