Adityanath sorkari aluyimertem dang sentsüh lakh 1 tashi atoker

Lucknow, April 03 (Agencies): Tanü Uttar Pradesh Chief Minister, Yogi Adityanath-i ayongzüka tang mezüngbuba Cabinet senden amendang aluyimertem dang sentsüh sen lakh ka tashi atoktsü atema telemtetba agiogo.
State sorkari aluyimertem dang sentsüh sen lakh ka tashi atoktsü telemtetba agiba ajanga tilateri aluyimer tajemba agi crore 2.5-i tajangzük angutsü.
Osang ka ajanga ashiba agi, Yogi Adityanath-i aniba sorkari iba telemtetba agiba ajanga senpong nungi sen crore 36,000 tashi intoktsü.
Aluyimertem dang sentsüh atoktsü lemtetba dak alia Uttar Pradesh Cabinet-i, nashi tepsetba kitem memelatsü aser anti-Romeo squads-a melaogo.
Cabinet-isa state nung aluyimertemi züngsentetba wheat tsük shilem 100 alitsü lemtetogo.
Adityanath sorkarisa Ghazipur nung sports stadium ka amenoktsü telemtetba agi.
Deobarnü Chief Minister, Adityanath-i, Bundelkhand region nem sen crore 47 teyari agutsütsü sangdonga liasü.
Uttar Pradesh Deputy Chief Minister, KP Maurya aser UP Minister, Shrikant Sharma na tang mezüng Cabinet senden atema Lucknow-i arua liasü.
Tawa agiba assembly election mapang nung Bharatiya Janata Party (BJP)-i state nüburtem dang, parnok sorkar tashii aruba sülen mezüngbuba cabinet senden nung aluyimertem dang sentsüh atoktsü atema lemtettsü, ta nangzüka liasü, aser tang parnoki nangzükba ama inyakogo.
Election mapang nungsa BJP-i light power methitemi agutsütsü, nisung lakh 70 nem mapa agutsütsü, graduation tashi tetsürtem nem angati shisaliok agutsütsü tenangzükbatem densema aika nangzüka liasü.