Adobe-i Aadhaar nung amendaker ‘e-sign’ solution amshitsü

New Delhi, October 04 (Agencies): Linük nung ‘e-signatures’ kanga junga amshiteta aotsü mechi nung Bodhbarnü Adobe-i Aadhaar nung amendaker nisung jangjatsü asoshi e-signature solution “Adobe Sign” atema sen indoktsü sangdongogo.
Tawa agiba “Adobe E-signatures Indian Market Study” nung ngutetba dak ajemdaker company-i, India nung e-signatures market ya ‘Compound Annual Growth Rate (CAGR), noklang nung shilem 57 nung ainer aser 2020 tashi nungbo transactions million 90 ajangteta atutsü akok.
“Tang market nung iba maparen noklang nung shilem 30 shi mapa küma odar aser company temi noklang nung shilem 70 shi ano parnok e-signature maparen tenzüktsü anendaka lir. India nung ozüng tejangja kübok e-signatures mapa akümtsü atema ‘Adobe Sign’ ajanga Aadhaar nung amendaker nisung jangjayim inyakba ya industry nung tang mezüngsüa inyaker,” ta Managing Director, South Asia, Adobe, Kulmeet Bawa-i ashi.
“Iba temelaba ajanga shishilemba nung tajungshiba agütsütsü,” ta Bawa-i sangdong ka nung ashi.
“Adobe Sign” nung Aadhaar nung amendakba e-signature ajanga kulam agi mapa bula sign asüba mapang kümzüktsü aser digital ajanga tamshirtem tejangja meteta lokti yaritsü asoshi lir.
India nung shishilembar aikati Software-as-a-Service (SaaS) inyakyim aginüa tejangraba sayuba ajanga Adobe-isa ano linük nung ‘local data centre’ tasen ka lapoktsüogo.
“India ya Adobe asoshi sentong mapang akümba tesem ka lir aser onok indang engineering labs temi yangi aliba customer tem nem nüngdakba mapa takok ngua inyaktsütsü asoshi sen indoktsü mesasai inyaktsü,” ta Vice President, Engineering, Adobe Document Cloud, Abhigyan Modi-i ashi.