‘Adopted or Surrogate tanur’ indang lai-o tesayuba kar

~ Rev. Dr. S. Temjen Imchen,
Associate Professor, Serampore College.

Tang asen putu tendak Ao Arogo kar nungbo, tanur meshitetba certificate ji ‘adopted’ or ‘surrogacy’ tanurtem nem magütsütsüla ta ashiba angur. Iba indang laishibai kechi ashir? Temeshi Laishiba nung ‘adoption’ indang tejangja otsü aika lir. Saka, ‘surrogacy’ indangbo lai-o nung jangja-abo shia mangutsü akok, kechiyong iba yimya-yimpong ya tanü asüng modern world nung ajangshiba aser tatalokba mapa ka lir. Ajisaka, kodang kibong ka nung tanur mekadir, item tsüraburi iba yimya-ana rongnungji lenmang ka benshia tanur ka tebu-jaa techir kümdaktsür. Iba o indang tatsü agi asenoki angatettsü merangdi.
a. ‘Adoption’ aser ‘Surrogacy’ tetezü: Engraji oshi nung ojang ka ‘adoption’ ta asüba ya asen Ao-o nung “tebu ajaba/techir akümba” tetezü lir. Taküm-ren tebu (biological father) masüyongjia, iba amala tasoba kaket kuli (birth certificate) nung mulongtepa züluteper tila tanur ka jagi tebu-ajaba maparenji agiteper. Ano, tanü asüng science aser technology züinba den külemi, shir kibong nung tanur mali, item atema IVF (in vitro fertilisation) ajanga tangar tetsü ka ajanga tanur sotsür (a child born through surrogacy). Tila tanur ka tangar tetsü ajanga sotsüba asüyonga (surrogacy), mesüra tangar chir ka pei chir ama tebu-jaa kümdaktsüba item yimya anaprongla jagi kibong ka abensadaktsür. Mesura kodang telok ana tsungda nung tangatetep tajung ka yur külen, tanur ka agidir ibajia tim chirnur (legitimate child) ka akümtsü akok ta Indian temzüngi ashir aser melar (Tajungba asoshi, ibai züngang: Asha Bajpai [2018]. Child Rights in India: Law, Policy, and Practice).
b. Tebu-ayimba yimyaji Laishibai melaba mapa ka lir (‘Adoption’ is Biblical): Laishibai ashir, asenok Tsüngrem chirtem aküm. Meimchirji samar liasü aser tarutsü asoshi kecha teyimla mekai alidang, Tsungremi meimchir bushi aser Pa senmanger kümdaktsü (Yoh 3v16). Tejen lai nung bushidangra, Mosaji Ibri nunger tila tanur ka asüdang pa Egypt lima nung chubar kibong nung züngsem ka kümdaktsü aser Farao jalai pa nung “Moses” ta melentsü koba tetezü pa “tzü nungi agitet” (Anitet 2v10).
Tasen lai nunga tanur kati koma techir-akümer iba yimya-yimpong indang jungjunga shia angutsü. Tat.agi, Galatia 3:26 & 27 nungji yamai zülua angur: “Kechiyong Khrista dak tamang akaba ajanga asenok Tsüngrem chirtem lir. Kechiyong nenok shirsa Khrista nung baptiogo, nenok Khrista dak sübuogo.” Arogoji tanülar jenjang aser tekümtet lenmang tuyuba lokti tentet ka asünung, meshitetba certificate kaji “tebu-jatetba” tanur ka asüyonga (adopted), mesüra “tangar tetsü kati sotsüba tanur ka” (surrogacy) asüyonga, Tsüngremer yimli nung iba tanur jia züngsem ka lir.
c. Asen Baptist Tamangba Telok nung Adoption aser Surrogacy Indang Tangatetba:  Asenok Ao Arogo tamangba tenzükdakji American Baptist Church ya lir. Asen limai Khrista osang tajungji American baptist missionary Rev. Dr. Edward W. Clark ajanga 1872 küm bener aru. Akidang nungi tanü tashi ABAM kübok Arogotem aser American Baptist Churches (ABC) madak asen Baptist tamangba temzüng timba ka saku-ku dang lir. Ashiba agi, ABC arogotem nung tanur shiaji – whether ‘adopted or surrogate’ – Arogo nung kesasa dang ‘Tanur Meshitetba Certificate’ (child dedication certificate) ji agüja benshia aor ta ashir.
Parnok tamangba aser benshiba yimya nung ashiba agi, kodangsa American Baptist Arogo kübok kibong ka nung ‘adopted’ mesüli ‘surrogate’ tanur ka kibong kati aniokdir aser techir kümdaktsüdir, idangji iba meta aliba arogo aser lokti ajungai iba tanurji kanga pelashishia agizüker. Iba yimsü-yimpong ya tasen lai tendak, Yisu Khrista tesayuba ka mesük. ‘Yisui ashi, “Tila tanurtemji oda tokjang, parnok kü dang arutsü tesongtem; kechiaser, kotak yimli ibala meyong lir” (Mathi 19 v14). Asen Ao arogotem asoshia ABAM-i ibala inyakyim tejangja lateta yutsüa kar. Iba lai-o tetuyuba aser tanü asen ABAM inyakyimji medemdangra temesüktepji angutsü aser ano tajungba nung inyaktetsü jenjang tajung karbo ngutetsü südi.
Iba child dedication certificate agütsüyim yimya nungji asen Baptist tamangba temzüng telatetji laishiba nung amendaka lir. “Anungji Tsüngremi nisung pa mesükba nung tetsür aser tebur yanglu” (Lipok 1v27). Pa “mesükba nung” ta kodang shidir, iba ya Tsüngremi yangluba ajak rongnung meimchirji-sa tematiba jenjang nung yanglu. Nisung ka taküm aser jakla jagi Tsüngremer nübusen (personality), ochiba, tepur ajung aser shisatsü kuli sütsür. Nisung kadak Tsüngrem mesükba jakla aketbaji kanga metsünga-reta benshitsüla ta asen dang temeshi lai-oi tuyur.