ADP nung Mon district dendaktsütsü atema Governor-i PM dang mepir

Dimapur, Rongchii (April) 20 (TYO): Transformation Aspirational District Programme nung Nagaland nungi ano district ka dendaktsütsü atema Nagaland Governor, PB Acharya-i Prime Minister Narendra Modi dangi shidi ka zülu.
Iba mapa tenzükba atema Prime Minister nem tenüngsang agütsüba den külemi PB Acharya-i Transformation Aspirational District Programme atema Nagaland nungi Kiphire district shima aliba den Mon district shimloktsü atema mepishi.
Prabhari Officer Sanjay Kumar, IAS-i Nagaland semdangdang Governor dang Aspirational District Programme indang osang metetdaktsü.
Iba programme ya Aenjeti (January) 2018 nung Prime Minister-i tenzüktsü aser iba sentong asoshi shima aliba district tem tekaratiba nung melenshidaktsütsü atema alizüng lir, ta Sanjay Kumar-i ashi.
Iba sentong asoshi state sorkari ketdangsütsü aser district shia nung tang nüngdakba aser teinyaktsütem dak rangloker mapa inyaktsü, ta paisa shisem.
Governor Acharya-i Prabhari Officer Kumar dang iba dak sendakba osang ita shia pa nem sangokjang ta mepishi.
Tan hopta tetenzüklen Nagaland Chief Minister den ajurutepdang Acharya-i iba onük lemsatep.