Advani aser M M Joshi nungeri BJP atema nübo ayimtsü

New Delhi, September 23 (Agencies): BJP lenir tain Lal Krishna Advani, Murli Manohar Joshi aser actor nungi yimtenren lenir akümsang Shatrughan Sinha nungeri BJP atema Bihar election nüboyim sentong nung shilem agitsü.
Osang ajanga ashiba agi, Ato kilonser Narendra Modi aser Union minister tem- Rajnath Singh, Arun Jaitley, Sushma Swaraj, Smriti Irani, Ravi Shankar Prasad aser Rajiv Pratap Rudy nunger-a party atema nüboyimtsür tenüng tarensen 40 rongnung dena lir. Tanü parnok tenüng 40 ji Election Commission ket nung agütsüogo.
Ano iba tarensen nung BJP chief minister tembo Madhya Pradesh chief minister Shivraj Singh Chouhanand aser Jharkhand Chief minister Raghubar Das na dang lir.
Kasa tarensen nung BJP National Tir Amit Shah-a densema lir.
Yaküm May ita Centre nung Modi-i aniba sorkar tashi aruba mapng nungi BJP lenir tain Advani aser Joshi na party nung sentoka arur, aser tena BJP’er Margdarshak Mandal nungang züngoka liasü.
BJP-i lenir tain Advani aser Johi nunger ama party nung sentokba atema taoba mapang Bihar chief minister Nitish Kumar-i BJP aija liasü.
Ano Patna Sahib nungi BJP MP, Shatrughan Sinha-ia yimjak nung par party aiben aija jembiba aser Bihar chief minister Nitish Kumar tenüng asangba atema BJP aiben pa dang jashia tekümdangtsü o shia aruogo.

You must be logged in to post a comment Login