Advani-i 6 Red Snooker World Championship bronze agizükogo

Bangkok, September 09 (Agencies): India nunger snooker asayar, Pankaj Advani-i semifinal asaya nung tamakok ngua, tang tasayadak Sangsom 6 Red Snooker World Championship bronze medal tanü, Hokolbar nü agizükogo.
Advani-i tan bronze agizükba sülen Sangsom 6 Red Snooker World Championship bronze medal agizüker mezüngbuba India cueist küma, otsü tasen yanglur lir.
England nunger Michael Holt madak walkover asaya yimya agi quarterfinal asaya akoksang, Advani-i par semifinal asaya nung China nunger Ding Junhui madak takok monguteti tan asayamong nung joko toktepa masayatettsüsa jenjang tamajung ajurua liasü.
Ding-i tanü points 0-37, 68-0, 73-0, 41-26, 49-15, 7-57, 0-57, 67-0, 57-0, 20-34, 69-9 anguba densema, ajak agi points 7-4 agi Advani tsükdaktsü.
“Iba asayamong nung India tenüng nung medal agizüker mezüngbuba asayar akümba ajanga ni tan asayamong nung junga shilem agiogo ta bilemer. Ding ya asayar tajung ka lir aser ni pa madak group asaya nungbo takok ngua liasü saka pai tanü kü madak takok nguogo. Pai finals nunga takok ngua shilem agitsü atema sarasademtsür,” ta Advani-ia metetdaktsü.
Ano külen, India nung nübur ka nem agütsüba tematiba sempet rong nung 3 buba, Padma Bhushan agütsüdaktsütsü atema Billiards & Snooker Federation of India (BSFI)-i Advani tenüng benokogo.
Taoba mapang billiards & snooker world champion akümtsü jenjang 15 ben tashi ajangzüksang, Advani tenüng yaküm, 2015 küma benok saka pa nem iba nungtugu sempet magütsüi süidakja liasü.
“Advani nem Padma Bhushan sempet agütsüdaktsütsü atema pa tenüng taküm agi kümnabuba atema atonga benokogo aser takümbo pa nem iba nungtugu sempetji asangsang nung agütsütsü imlar,” ta BSFI secretary, S Balasubramanian-i osang jangjashitsü.
Advani-i taoba mapang, 2004 küm Arjuna Award, 2005-06 küm Khel Ratna aser 2009 küm Padma Shri sempet agizüka lir.
2016 küm asoshi Padma Bhushan sempet agütsütsü atema tetemsü nisungtem shimba osang Republic Day anogomong amongba anogo ka jakdang sangdongtsü renema lir.