Advertisement ka atema Pierce Brosnan anema ken o benok

Tsüklai 15, 2018 (Agencies): Temesepba chiyongtsü, tobacco adenba Pan Bahar advertisement ka nung shilem agiba asoshi India nung ketdangsertemi Pierce Brosnan anema ken o benok. Iba osang angashiba sülen pai tatok meshi aser iba product nung temesepba chiyongtsü densema aliba indang memetet liasü, ta pai ashi.
Tapet telangzüba magütsüra actor Brosnan dang senchi sen 5,000 achitsü mesüra tepuokdak küm ana tashi ayutsü akok, ta India nung ketdangsertemi ashir. India nung tobacco aketba chiyongtsü/oset advertise asüba ya ozüng alema inyakba maparen ka lir.
Iba advertisement atema contract nung tobacco mesüra nisung temang nung timtem agütsüba chiyongtsü maliba indang ‘breath freshner/tooth whitener’ ta shia lir, ta Pierce-i ashi.
“Küm ter dak tali tetsürtem temang anema alitsü aser tzü mopung wazüka ayutsü atema inyaka aruba nisung ka asünung, Pan Bahar-i temelaba melie aser tangar külakoktsütsüsa kü indang noksa amshia pan masala product nung amshiba angashia ni kanga süoki ia bilemer. Nisung temang nung timtem agütsüba product ka ajungkettsü asoshi ni tezüngzüktem kodanga magila,” ta pai ashi.
Pan Bahar-i media amshia pa item indang brand ambassador kümdaktsüba ya James Bond film nung shilem agisangi aitsü aser contract nung maliba ama inyak, ta ashi. Pai item product aser advertisement ajunga nungi pa indang noksa indoktsü takhangba agütsüogo.
“Cancer ajanga kü idang mezüng kinungtsü aser jala dang masü saka medemer aika taküm samatsüogo. Tetsürtem temang anepaliba aser nisungtem temang tajungba kümdaktsütsü asoshi inyakba sentong nung ni bendanga agütsür inyaker,” ta pai ashi.
“Ni iba ken o angatetteptsü. Kasa mapang nung ni jashidakja alirtem ajungai ni tatok meshiba ya imlibilema agizükangma,” ta pai-sa shisem.