Advertisement nung CM aser Anghtem noksa adoktsü SC-i melar

New Delhi, March 18 (Agencies): Taruba ita state pongu nung Assembly election agitsü lia Hokolbarnü Supreme Court (SC)-i 2015 küm order reprangshiba sülen sorkar advertisement balala nung Anghtem aser chief minister tem noksa amshitsü temelaba agütsüogo.

2015 küm SC-i, sorkar advertisement tem nung Ato kilonser, Tir aser Chief Justice noksatem  dang amshitsüla ta tuyuba sülen Centre sorkar den state aikati SC dang iba tetuyuba meyipa reprangshitsü mepishia liasü.

Centre-i temepishiba shidi nungji, shirnok noksa amshitsü aser kechisa amshitsü’ar ibaji sorkari lemtettsüla ta ashiba den külemi item inyakyim nung court tiyongtsüi maittsüla, ta shia lir.

State sorkartem pusema Centre-isa, advertisement tem nung chief minister tem noksa memelabaji federal inyakyim anema lir, ta shidi nungjisa shia lir.