Advertisement nung Imran Khan teloki billion 1.63 endok

Islamabad,Metsüremi 12 (Agencies) : Khyber Pakhtunkhwa nung Imran Khan-i aniba Pakistan Tehreek-i-Insaf (PTI) teloki taoba küm pongu tsüngda ‘media campaigns’ balala nung sen Rs 1.63 billion shi endokogo, ta parnoki inyaksaba kuli kar senior official kati tanü Tentonü Supreme Court dang tuteta shiogo.
Chief Justice of Pakistan Saqib Nisar-i anir nsiung asemi akümba obendanger luden matsüngdang KP Information Secretary Qaisar Alam-i tuteta shiogo.
Taküm küm tatemlen agitsü aliba election jakdang Punjab, Khyber Pakhtunkhwa aser Sindh nung takok angutsü nükjidong yur provincial sorkari osangkakettem aser tanaga osang balala ajanga advertisement nung senotsü lalushibongba anema benoka aliba ken o ka angadangba mapang pai ibaji metetdaktsü.
Ken o angadangba mapang KP sorkari print & electronic media nem advertisement kwi agütsü aserbo kwika nung PTI Chairman Imran Khan aser Chief Minister Pervez Khattak noksa maloker adoktsü (?), ta Chief Justice-i asüngdanga liasü.
Pai asüngdangbaji langzüa, provincial sorkari taoba küm pongu tsüngda advertisement nung sen Rs 1.63 billion endok aser tesüiba ita asem tsüngda sen Rs 204.7 million endok, ta Alam-i langzüba olen ka Dawn News ajanga sangdongogo.