Advisor Chuba Chang-i Mon District Court Complex nüngshilung azüngtsü

Mon, Rongchii/April 22, 2022 (TYO): Hokolbarnü, Advisor, Law & Justice and SCERT, H. Chuba Chang-i Mon nung District Court Complex nüngshilung azüngtsü aser Judicial Officer’s Quarter semzükja liasü, ta sangdong ka ajanga metetdaktsü.

Iba sentong nung, Chang-i, lokti nung tim inyakyim ajanga ochi obendang agütsütsü aser maparen süsümedema aotsü atema customary laws aser judicial system tsüngda liromedemtsüla, ta ashi.

Pai Naga nunger lokti tsüngda legal awareness dak sendakba tongtibangtem rasa ashi.

MLA, N.Thongwang Konyak-i, Mon nung alir nüburtemi mapang talangka nungi District Court Complex ka yanglutsü jangra liasü ta ashi aser iba Complex atema nüngshilung azüngba den project tenzüktsü mera agiba asoshi pai Department dang pelaba metetdaktsü.

Iba project yakta renemtsü aser iba Complex ajanga District nung ochi obendang agütsüba inyakyim tajungba akümtsü imlar, ta pai ashi.

Iba maparen atema metetemi nungitta aser ajungmesoba atema Department tenüng nung Secretary Judicial, Department of Law & Justice, Nino Iralu, NJS-i Advisor aser Chief Minister naprongla dang pelaba lemsatep.

Mon nung judicial system takok ngua achaayanga inyakdar, saka infrastructure tajungba melentsü nüngdaka liasü. Tanü, iba complex atema nüngshilung azüngba aser Judicial quarter semzükba ajanga temelenshi adoktsü teimla sayur, ta lai shisem.

Infrastructure tajung mali yongjia timtem ajak arema pei mapa nendaka inyakba atema DC Mon, Thavaseelan K, IAS-i Judicial Officer ajak nem tenüngsang agütsü aser iba Complex renemer sülen, parnoki ano  maparen tajungtiba achaayanga inyaktsü, ta ashi.

Mon nung District Court Complex lir ta nübur dang sayutsü asoshi iba Complex yakta renemtsü imlar, ta DC-i ashi.

Executive Engineer, CAWD, Sungtiba Amer-i, judicial quarter indang technical report agütsü, kong lakh 223.61 shi indoka iba quarter yanglua liasü.

Iba sentong nung Chief Judicial Magistrate & Civil Judge (Sr.Division) Mon, Wonchibeni V. Patton, NJS menden liasü. District & Session Judge, Mon, Tucuno Vamuzo, NJS-i telok pela agizükba o jembi aser Secretary Law, Department of Law & Justice, Ngamjok Konyak-i tepela anküp o jembi, ta kasa sangdong ajanga ashi.