Advisor H. Haiying-i Longleng nung District Jail semzüktsü

November 18, 2021 nü Longleng District Jail semzükba mapang tangokba noksa ka nung Advisor, Prisons and Printing & Stationary, H. Haiying; Minister, Health & Family Welfare, S. Pangnyu Phom; Advisor, DUDA, N. Bongkho Konyak aser MLA, S. Keoshu Yimchunger nungertem den ketdangsürtem angur.

Dimapur, Yimpoksüi/Nov. 19 (TYO): Advisor, Prisons and Printing & Stationary, H. Haiying ajanga November 18, 2021 nü District Jail, Longleng semzükja liasü. Iba sentong nung Minister, Health & Family Welfare, S. Pangnyu Phom; Advisor, DUDA, N. Bongkho Konyak aser MLA, S. Keoshu Yimchunger nungertema dena liasü.

Executive Engineer (CAWD) Kohima, Er. Sungtiba Amer ajanga iba jail yangluba indang osang agütsü.

Advisor Prisons, Printing & Stationary, H. Haiying-i iba sentong nung jembiba mapang, state nung district jail ter aser central jail ka lir, aser Longleng District Jail bendenlokba ajanga Nagaland nung jail ter-ser ana alitsü, ta ashi.

Iba maparen inyakba mapang timtem jenti ajurua liasü saka takok ngua renemogo, anungji contractor, engineer aser iba jail yangluba nung shilem agir ajunga nem tenüngsang agütsür, ta pai ashi.

District Jail tasen ka amenoker asünungji, tang nungi tenzüka teyari atema danga district dak metaloker malitsü aser ajak atema anisüngzük asütsü, ta Haiying-i ashi.

Pai iba sentong nung adener ajunga dang, district nung iba ama ki-o-jen aliba ajanga nüburtemi lenmang shidak nung jajatsü, ta ashi.

Tanü tendak tangatetba nung jembira, jail ya metongshitsüba services ka amai lir, ta pai ashi. Asenoki bilema kazüba kisüng masü saka nendaka aser temolung agüja mapa inyaktsüla, anungjidang tejakleni aotsü, ta Advisor-i ashi.

Paisa nüburtem dang amalitep akatsü ajungshi, anungjidang district jail ya tarutsü nunga state nung model jail ka ama züngshitsü, ta ashi.

District Jail aliba ajanga mapa tamajung inyakba, temesepba mozü achi-ajemba aser auyaba tebilemtsü samatsü imlar, ta iba sentong nung Minister, Health & Family Welfare Minister, S. Pangnyu Phom-i ashi.

Pai District Administration, NGOs aser nüburtem dang kati ka den amalitep akatsü aser iba ama ki-o-jen tajungtiba nung amshitsü ayongzüka liasü.

Paisa iba sentong nung adener dang COVID-19 anema mozü agitsü ajungshi aser tang tashinung iba tashidak nungi kumzüktsü atema tajungtibaji mozü agitsüba ya lir, anungji ajak tekeratiba nung mozü ya agitsüla, ta ajungshia liasü.

Iba sentong nung Advisor, DUDA, Bongkhao Konyak; MLA S. Keoshu Yimchunger; ADC Longleng; Bhumnyu Village Council Chairman aser tir, Phom People Council nungertemia jembia liasü.

Iba sentong nung SRO (Plg) Prision HQs, Kohima, C. Lwngnyei Konyak menden liasü aser Senior Superintendent of Jails Prisons HQs, Kohima, Khushito Awomi ajanga melepzüng o jembi. Maneni Pastor, Oushok Baptist Church, Rev. Chingkon ajanga iba jail meshiteta sarasademja liasü.