Advisor Yhome-i Naga nunger oral traditions wazüka ayutsü ayongzük

Kohima, Mongputeni/Oct. 30 (TYO): Hokulbarnü Advisor, School Education, Dr. Kekhrielhoulie Yhome-i Naga oral traditions, tar nunger otsü aser lisopur shisatsü tem zülubanglu amshia wazüka ayutsü tongtipang ta ashi aser sobaliba ayak wazüka ayuba nung otsü ashiba aser creative writing ajanga tongtipang shilem agir, ta ashi.

Writers Collective Kohima ajanga “From Hearth to Page” omen kübok Don Bosco Higher Secondary School, Kohima nung trok buba Nagaland Literature Festival ayongzükba sentong nung jembidang, Naga nunger kenshi oshi ya tejen masü, kechiaser puti otsü timba tebang o dang lir, ta Yhome-i ashi.

Tar nunger otsü, akhi alemli mapang amangba tem aser yimyakoya nung tangazüktsü jenti lir aser itemji lanu putu nem belenoktsütsü nüngdaker, ta pai ashi.

Pai Greek aser Roman nunger otsü tejen aser tamangba yimsütem athishia item otsütem ajanga sobaliba yanglushia putu aika amshia arur ta ashi.

Kaket ken o zülurtemi tangatetba melenshitsütsüla, amenoka aliba otsü nung tasüngdangba alitsüla aser maitsü balala sayutettsüla, ta pai ashi.

Naga nunger yimsü, külemkeja aser lisopur shisatsü nungya kenshi oshi tsütsü tali bushiloktsü peria lir aser nüburtem tajungba nung angatettsü, ta Yhome-i ashi.

Writers Collective Kohima tir Vishü Rita Krocha-i sentong tenzüka jembidang, iba telok ya 2019 küm kenshi oshi jangrar nisung pezüi Naga nunger kaket ken o aser otsü ashiba tem Nagaland Literature Festival ajanga ajungkettsü nükjidong nung tentet ta ashi.

Tangbo iba telok nungya züngsem 11 lir aser mezüngbuba benjong ya 2021 küm ayongzük aser senotsü peria meliaka küm shia ayongzüka arur, ta lai ashi.

“From Hearth to Page” omen yagi Naga nunger senmangren tebang agi ashiba nungi kaket nung zülua adokba aser digital forms nung amshiba indang ashir, ta Krocha-i ashi.

Iba benjong yagi zülua aliba kaket ken o aser temulung nung rizünga aliba otsü tem benjongtsü asoshi kaket zülur, tebang agi otsü ashir aser performers tem lungjemdaktsür, ta ashi.

Lai state sorkar dang lanur asoshi keshi oshi aser artistic development nung rongsen indoktsü ayongzük aser iba ama sentong asoshi rongsen tsütsü timtem majurudaktsütsüla, ta Krocha-i ashi.

Trok buba Nagaland Literature Festival nungya Poetry, Short Story aser Essay atema NLF Prizes saya, aser item atema tenüng 80 dak tema agüja lir. Item tetoktepba nung takok angurtem ya iba benjongmung October 31 nü tembangba mapang sangdongtsü.

Kasa sentong nung kaket pezü sayaa liasü.

Anogo ana benjongmung nungya kaket, creative works, chiyongtsü aser tanga osettem sayutsü asoshi stalls 15 amenoka lir, kong Woods Publishers, Barweaver, Pen Thrill, Heritage aser 6th Finger ama kaket menünger temi shilem agitar.