Advisor Zale-i YRS dept dang teyari meshi

Kohima, Monupii/May 03 (TYO): Tanü Youth Resources and Sports (YRS) Advisor MLA, Zale Neikha-i department ketdangsertem aser staff tem dang NDPP-i aniba PDA sorkar omen ‘O masü mapa’ nungittsü aser state nung temelenshi atema nangzükba ataloktsü atema amalitepa inyakdaktsüner, ta metetdaktsü.
Directorate of YRS, Kohima nung department pur den metetpelaba sentong nung jembidang Neikha-i, kaket nung züluba agi masü saka mapa agi inyakba ajanga dang Nagaland nung terenlok aser temelenshi adoktsü, ta ashi.
State nung saisapongertem ajungmesotsü atema saisapong ajungkettsütsü asoshi inyaktsü, ta shia pai, mata mabensartem dak rangloker mapatong tapet benoka inyaktsü, ta metetdaktsü.
Tesasaba olen ka nung pai, Naga nungeri saisapong jangrar, ajisüaka saisapong jangraba ajanga Naga nungeri saisapong ka nung rangloker masü saka saisapong aika nung rangloker inyaker, ta ashi.
Iba dak sendakba nung pai, saisapong nung mongin akumtsü atema sorkari lanurtem, talisa saisapongertem ajungmesoa parnok dak aketba sempet apir saisapong ka nung dang rangloker mongin kümdaktsütsü atema inyaktsü, ta metetdaktsü.
Neikha-i ashiba agi, tawa pai Delhi semdangba mapang nung Ministry of Youth Affairs & Sports ketdangsertem aser Union Minister of State (Independent Charge) Col R S Rathore-i saisapong ajungkettsütsü aser lanurtem atema sentong balala asoshi saisapong projects benoka inyaktsü metetdaktsüogo.
Iba nungji ajemdaker pai department ketdangsertem dang asalentong yanglutsü, amalitepa inyaktsü aser ochishia nendaka inyaktsü ayongzük.
Advisor-isa, “Asenoki executive menden nung mener ayongayonga mekazüli. Asenok tangatetba melenshir inyaktsü mapang tongogo. Asenoki pei teinyaktsü shilem inyaka department aser saisapong asüngsashidaktsüdi,” ta ayongzük.
Advisor-isa state nüburtem aser Naga nunger lokti ajungkettsü atema tayongzükbatem kokteta temelenshi alitsü atema amaalitepa inyakdaktsüner, ta metetdaktsü.
Kasa sentong nung Commissioner & Secretary (YRS), Anenla S Longchari-ia jembi aser department kübok National Service Scheme, NCC, Bharat Scouts & Guide, Music Task Force aser Engineering Wing functioning-ia pei pei unit nung timtem balala ajangshiba lemsatepa liasü.
Iba sentong ya YRS Director, Imtirenla Jamir leniba nung agi aser Superintendent Avono Neikha-i sarasadema liasü.