Advisory committee tentettsü lemtetba agientsüla: Naga Council

Dimapur, November 02 (TYO): Municipal Act kübok Arrla 23 (A) ya Naga customary inyakyim den meputer, talisa India Temzüng nung Arrla 371(A) den meputeper, anungji iba Act kübok Naga nunger den meputepba ozüngtemji reprangshitsüla, aser yamaji mesüibo Dimapur nung amenoka aliba lokti tentettemi, state sorkari Nagaland nung Municipal aser town Council nung advisory committee tentettsü atema inyakbaji anema nokdaktsü, ta tanü Naga Council Dimapur Vice President (Adm) K. Ghokheto Chopy aser General Secretary, Thsapongkyu nati sangdong ka ajanga metetdaktsü.
“Anungji Dimapur nung alirtem asoshi aser talisa Naga nunger ajak ajungtsü atema onoki Chief Minister dang iba onük ya süoki ia agia tiyongtsü aita inyaktsü mepishir, aser Municipal Department order ji tangsa thinentsütsü mepishir. Iba onük anema nüburtemi ain adoka nokdakra iba khuretji state sorkari abentsü,” ta kasa sangdong ajangasa metetdaktsü.
Ano külen Naga Council Dimapur kübok Dimapur nung amenoka aliba GB’s (Sadar) Union, Naga Women Hoho Dimapur (NWHD), Dimapur Urban Colony Council Federation (DUCCF) ama lokti tentettemia shidi ka ajanga Nagaland Chief Minister dang, Dimapur Municipal Council office dak sendakba nung temepishiba onük kar agütsü.
Parnoki Chief Minister dang, tang Chief exectutive officer (CEO) administrative tekolak kübok DMC inyakyim ajanga municipal office maparen ajak junga inyaka odar, aser ibaji ajanga Dimapur nung sensotemi terenlok mapatem angubaji tejangja, ta metetdaktsü.
Ajisüaka tawa state sorkari municipal administration den yaritepa inyaktsü atema Municipal affairs department kübok advisory committee ka tentettsü atema inyakba ya, tesüiba mapangtem nung ama, terenlok mapa makai public sen crore aika ochimashi nung amshitsü südi ta reprangteter, anungji advisory committee tentettsü atema inyakbaji agientsüla, ta metetdaktsü.