Advocates anema benokba ken o Feb 26 nü angadangtsü

New Delhi, February 25 (Agencies): Patiala House court temeket nung advocate asemi JNUSU Tir, Kanhaiya Kumar den osangbenertem aser kaketshirtem dak azükba sülen parnoki iba indangji mezümeküma jembiba video nung prokshiogo aser ibaji anema temepishiba ka benokba asüng Hokolbarnü angadangtsü Supreme Court (SC)-i tanü melungogo.
Advocate Kamini Jaiswal-i benokba temepishiba ka tang rongtak angadangtsüla ta okatsür Prashant Bhushan-i benokba sülen Chief Justice T S Thakur aser Justice U U Lalit nati akümba SC bench-i, “Ibaji asüng bench kati reprangtsü zülua yuang,” ta ashi.
Bhushan-i, ano Justice Chelameswar-i JNU ken o ka March 10 nü angadangtsü lemtetogo ta metetdaktsü.
Iba temepishibaji yashi SC nung benoka liasü, iba den külemi February 15 aser 17 nü Patiala House courts nung advocate temi osangbenertem, kaketshirtem, tesayurtem aser Kanhaiya nunger dak azükba tatalokbaji SIT ka nem bushisüngdangdaktsütsü asoshi takhangba agütsüogo.
Advocates- Vikram Singh Chauhan, Yashpal Singh aser Om Sharma nungeri osangbenertem, kaketshirtem aser Kanhaiya nunger dak azükba indang mezümeküma jembiba video ka prokshiba sülen parnok anema iba temepishiba benok.
Iba temepishiba nungjisa Ministry of Home Affairs aser Delhi Police temji obang ka ser inyak ama benoka lir.
February 15 nü JNU kaketshir Union Tir, Kanhaiya anema ken o angadangtsü aliba court, Patiala House court kima advocate telok kati osangbenertem densema JNU kaketshirtem parnok nisung trok dak azük ta tai tonglokja lir.
Iba anogo nungji court-i ken o anga metenzüdang obendangertem kar court takdangi ai aser osangbenertem densema JNU kaketshirtem den tesayurtem kimai nungzüka yok, aser parnok dang court telungtet toktsür oang ta ashi. Ano telok kati osangbenertem indang identity cards reprangba sülen court toktsür aotsü tuyu, ajisüaka osangbenertemi ibaji ashishia court toktsür maoba ajanga azük.
Tesülen police-i kaketshirtem, tesayurtem aser osangbenertem ajak court nungi arizüka yoka liasü.