‘Ae Dil Hai Mushkil’ film sayatsü temelaba agütsüogo

Mumbai, Ocober 22 (Agencies): Tanü Ae Dil Hai Mushkil film director, Karan Johar den Producers’ Guild President, Mukesh Bhatt nati Maharashtra Chief minister, Devendra Fadnavis ajurua pa dang, film yanglurtemi Pakistan nunger actor tem den meinyaktsü ta nangzükba sülen iba film sayatsü atema lenmang lapokogo.
Ajisüaka iba film sayaba jakdang Karan Johar-i kiralongrartemi Uri amakdang asür sepaitem nem tama akhüm tetushi agütsütsü.
Tanep Johar aser Bhatt nati Maharashtra chief minister par ki ‘Varsha’ nung ajuru, iba mapang nung MNS tongti, Raj Thackeray-a liasü.
MNS party-i iba film sayatsü anema nokdaka liasü, kechiyong iba film nung Pakistan nunger actor, Fawad Khan-i shilem agia lir.
Kasa senden nungsa Fox Star Studios nungi Producers- Sidharth Roy Kapur, Sajid Nadiadwala aser aser Vijay Singh nungera liasü.
Iba senden tembangba sülen Mumbai nung osangbenertem den jembidang Mukesh Bhatt-i, “Iba senden takok ngua kaogo, aser Ae Dil Hai Mushkil mezüng lateta aliba anogo nung sayatsü,” ta metetdaktsü.
“Iba film sayatsü atema tashishitep aliba atema onoki jembi. Iba onük nung ni film industry tangatetba metetdaktsü. Asenok tamasa, India nunger, iba sülen ang business lir,” ta paisa ashi.
Tarutsü nungbo Producers’ Guild mesüra film yanglur shingaia Pakistan nunger actors mesüra technician tem den meinyaktsü ta nangzükogo, ta paisa metetdaktsü.
“Ae Dil Hai Mushkil film screen nung mesayadang tamasa Karan Johar-i Uri amakdang asür sepaitem nem tetushi agütsütsü. Ibaji onoki asen sepaitem nem tetushi agütsüba asütsü,” a Bhatt-isa shisem.
Iba film nung Ranbir Kapoor, Aishwarya Rai Bachchan, Anushka Sharma aser Fawad Khan nungeri tongti shilem agia lir.
Tawa Pakistan nungi kiralongrartemi Uri nung sepai 18 tepsetba sülen linük nungi aikati Pakistan nunger nem film nung shilem magidaksütsüla ta ola adoka liasü.