Aenjeti 25 nü Naga nunger tongti lokti tentettem senden amentsü

Kohima, Aenjeti (January) 22 (TYO): Tanü Naga tribal tentetem, lokti tentettem aser pressure group balalai Aenjeti (January) 25 nü NBCC Platinum Hall, Kohima nung kanga tongtibang senden ka amentsü lemtetogo; iba senden nungji, Tsüklai (February) 27 nü Nagaland Assembly elections agitsü sangdongba agizüktsü asü magizüktsü, iba atemaji jembitsü.
Iba dak sendakba nung züngsem pezüi akümba standing committee ka tentetogo, aser iba luden nung züngsemtemji Naga Hoho, Nagaland Tribes Council, Eastern Nagaland People’s Organisation aser Nagaland Gaon Burahs Federation nungi lir, aser parnoki Naga nunger lokti tentettem aser yimtenren party tem den amalitepa senden nungji shilem agitsü.
Tanü Nagaland Joint Christian Forum (NJCF)-i NBCC Platinum Hall nung ayongzükba shisadokten senden nung iba telemtetbaji agiogo, ta senden nung adener rongnung kati metetdaktsü.
Naga nunger lokti tentettemi India sorkar dang, 2018 assembly election magidangyongi Naga yimtenren ken o tama latettsü atema takhangba agütsür, ajisüaka Aenjeti 18, 2018 nü Election Commission-i state nung election agitsü anogotem sangdongogo.
Tanü iba senden nung okila jembidang NJCF Tir, Rev. Dr. Zelhou Keyho-i, Naga yimtenren onük aser state election onükji Arogo den sendaktepa mali, ta metetdaktsü.
“Arogo shilemji, election timi junga agitettsü atema inyaktsü asoshi lir, iba den külemi Tsüngrem akhümtsübutsüsa lokti ka yangertettsü atema lir,” ta paisa metetdaktsü.
Tanü iba senden nung Naga Hoho, NTC, ENPO aser Nagaland Gaon Burahs Federation dak alia Central Nagaland Tribes Council, Ao Senden, Chakhesang Public Organisation, Naga Students’ Federation aser Against Corruption and Unabated Taxation Nagaland (ACAUT), Nagaland Pradesh Congress Committee (NPCC) aser NSUI Nagaland nungi züngsemtema densema liasü.
Senden nung züngsemtemi pei tebilemba aika lemsatep, iba den külemi Naga nungeri election masü saka Naga yimtenren onük latettsü atema takhangba agüjaaka Election Commission-i state assembly election agitsü atema sangdongba ajanga tang loktiliba aser yimtenren tensa tipmetemi aliba süngjemtsü atema ajak longjemtsü nüngdak, ta bangjema liasü, ta osang ka ajanga metetdaktsü.
Iba senden nungsa, Naga nunger lokti tentettem aser nübur ajak longjemtsü atema ketdangsüa amalitepa inyaktsü asoshji standing committee ji tenteta liasü.