Aerosmith teloki tatemsüa 2017 European Tour sentong agitsü

London, November 15 (Agencies): US nung tentetba rock kentener telok, Aerosmith-i küm 45 shi kententsü sabang nung tongti shilem agia aruba sülen tatemsüa, taruba 2017 küm Europe semdanga kententsü sentong balala ayonga agitsü renemba osang ka par teloki metetdaktsüogo.
1970 küm tentetba Aerosmith telok nung tongti kentener, Steven Tyler; guitar atemer, Joe Perry o Brad Whitford; drum atemer, Joey Kramer aser bass atemer, Tom Hamilton nunger densema lir.
“Ozü teloki taoba mapang mayongdangba kententsü sentong tongti ka Atlantic ajangdanga ayonga agiba sülen ozü teloki joko tarutsü anogotem nung kententsü sabang nung shilem magitsü akok,” ta par telok tenüng nung Tyler aser Perry nati sangoktsü.
Par teloki Israel kübok Tel Aviv nung kententsü sentongji sangküm May ita tenzükba sülen Russia kübok Georgia aser Germany densema, Europe ajunga sema senzütsü sentong lir.
Sweden Rock, France nung ayongba Hellfest aser Britain nung agitsü renemba Download Festival densema, par teloki tongti kententsü sentongtem nunga shilem agitsü renema lir.