Afghan mitkar helicopter tsükok; 17 shi tsüket

Kabul, August 06 (Agencies): Afghanistan mitkar helicopter tayimtsü ka par linük anülulentip tsütsü tanü Brehostibar nü tsükokba osang ka Afghan mitkar ketdangser kati metetdaktsüogo.

“Russia-i yangluba M-17 helicopter tayimtsü ka Zabul province kübok Shinkay district nung tanü tsükoka tayimtsüi anir alir mitkar züngsem 17 tashi tsüksetba osang tang tashi nung jangjaogo,” ta ketdangsersangi ashi.

Tayimtsüi technical timtem kar ajurua tanü tsükokba osang jangjaogo ta Afghanistan defence ministry-ia metetdaktsü.

Ano külen, peisasa pokseta asütsü mulungteter kati bomb alenokba truck gari ka Kabul anülulentip tsütsü pokdakja tanü lendong atalokdaktsüba osang jangjaogo.

Logar province yimtiba, Puli Alam nung atalokdaktsüba lendong nung ishiba agi police ketdangser 3 aser nübur 3 densema ajak agi nisung 6 tashi poksetba aser nisung 10 dak tema yiruba osang tang tashi nung jangjaogo ta police-i metetdaktsü.

Tanü lendongji par züngsemi atalokdaktsü ta shia, Taliban teloki tanü lendong atalokdaktsüba asoshi tenüng agia metetdaktsüogo.

Taliban tentetsang, Mullah Omar küm 2 tejaklen asüba osang tawa metetdaktsüba sülen par telok rong nung tebendang tulu adokba osanga jangjaogo.

Ajisüaka, Taliban telok rong nung tebangdang adoktsü tenzüka ajanga par telok aser Afghan sorkar na tsüngda tenzükba yimjung nung alitsü maparen nem tetsükdakba bener arutsütsü akok ta mongintemi metetdaktsüogo.

Afghanistan nung tongpang kanga sashia raraba ajanga taküm 2015 küm tom tashi nung tai maketba nübur 4,921 shi asüba kuli tejangja bushiteta lir ta United Nations Assistance Mission in Afghanistan (UNAMA)-ia yashi Bodbar nü metetdaktsüogo.