Afghan nung Kerala nungi IS züngsem ka asü

Kasargode (Kerala), June 19 (Agencies): Hombarnü Kerala Police nungi Intelligence ketdangser kati, Kerala nungi kiralongrar telok, Islamic State nung adentsü atema Afghanistan-i aoer ka süogo, ta metetdaktsü.
Kerala senso, Sajeer M. Abdullah asüba osang aser pa tasümang noksaji nisung ka indang mobile phone nung aru. IS nung adentsü atema aoer Kerala nunger nisung 21 rongnung nisung ka indang kinünger ka ket phone nung iba osangji angu, ta Kerala Police intelligence unit nungi ketdangser kati metetdaktsü.
Ajisüaka Abdullah ji kodang asü mesüra kechi kuli ajanga asüar, iba osangjibo memetetdaktsü, ta ketdangserisa ashi.
Kasargode nung osangbener den jembidang ketdangserisa, taoba mapangtem nungsa kasa nisungba indang phone nung IS telok nung adener Kerala nunger asem asüba osang aser noksa arua liasü, ta metetdaktsü.
“Iba dak alia osang tejangja mali. Onoki onok teinyaktsü inyakyimbo ajak inyakogo,” ta paisa shisem.
Yaküm Kerala assembly nung state Chief Minister, Pinarayi Vijayan-i, state nung tanur densema nisung 21 samaogo, parnok rongnung nisung 17 Kasargode district nungi aser Palakkad district nungi nisung pezü lir, ta metetdakja liasü.