Afghan nung Taliban-i nisung 12 tepset

Kabul, Aenjeti/Jan. 21 (Agencies): Afghanistan anüdoklen mitkartem aliba aser police training centre nung Taliben teloki amakba lendong nung nisung tajemba agi 12 taküm sama aser 30 dak tali yiru, ta Afghan ketdangsertemi ashi. Asürtem ya timba sepaitem lir.
Yirur alir ya kar provincial hospital nung anepalutagi aser kanga sashia yirur alirtem ya Kabul nung anepalutagi, ta iba tesem nung public health department tekolakba, Salem Asgherkhail-i ashi.
Osang agitepa amakba lendong ya Tentonü anepdang 7:00 (02:30 GMT) ako meta tenzük, kong bomb bena aiba gari ka Wardak province yimtiba, Maidan Shahr nung sepaitem aliba süngkum anasa pokdaktsü, ta Interior Ministry indang deputy spokesman, Nasrat Rahimi-i ashi.
Iba sülen raraba hadirtem bena aliba Taliban telok ya telungi ait.
Maidan Shahr ya Kabul nungi southwest tsütsü kilometer 44 shi orr Ghazni-Kabul highway nung lir.
Anasa aliba Logar province nung sepai ti taküm samatsür anogo ka dang lir maneni iba lendong ya ataloker.
Taliban telok ya tang tesashiba küma linük tesem balala nung lendong agüja arutagi, aser iba ajanga parnok tashi tuluba küma tarutsü nung yimjung ken o jembidang parnok tali ajangzüktsü akok.
Taliban teloki Afghanistan tesadang kashi amokbanga lir mesüra amokbangtsü meranger, ta US Special Inspector General for Afghanistan Reconstruction (SIGAR) ajanga ashir.
Taoba küm Chiteni/July ita nungi tenzüka US-i Taliban den yimjung lenmang bushitsü meranga inyaktepa arur. US ketdangsertemi Taliban telok nungi lennirtem den linük balala nung ajurutepa arutagi saka parnoki Afghan sorkar ketdangsertem ajurutsü memulunger.
Tir Donald Trump-i tekeratiba nung Pakistan Tir Imran Khan ajurua US aser Pakistan tsüngta tesendaktep yanglushitsüla aser Afghanistan nung yimjung atema jembitsüla, ta US Senator Lindsey Graham-i Amungnü Pakistan nungi ashi.
Pakistan-i Taliban yarir ta temulung melemtep adoka US aser Pakistan tsüngta tesendaktep tamajungba aküm, saka Islamabad-ibo magizüker.