Afghan Shi’ite Mosque nung nisung 25 pokset

Khost, Luroi 3 (Agencies): Rogonü eastern Afghanistan kübok Shiite mosque nung tekülemertem senteba aliba mapang kiralongrartemi pei temang nung bomb alenoker pokdaktsüba ajanga nisung aika poksetogo, ta ketdangser sangdong ka ajanga metetdaktsü.
“Paktia province kübok Gardez yimti nung aliba Shiite mosque, kiralongkartemi pei temang nung bomb alenoker amak. Iba lendong nung nisung aika süogo, saka onoki tang tashi nung kwi asü ajibo mejangja,” ta Paktia, provincial police chief, General Raz Mohammad Mandozai-i osangbenertem dang ashi.
Gardez public health department tekolakba Wilayat Khan Ahmadzai-i iba osang jangjatsüogo aser tasüba tali akümtsü tsübua bilemba lemsatep.
“Onok dangi yirur alir parnok 60 anir aruogo aser Gardez, civilian hospital nung nisung pezü süogo,” ta Ahmadzai-i ashi.
Afghanistan kübok jila balala tawa kiralongrartem kanga bulua amakba mapang ka nung tang iba lendong ya atalokogo. Kiralongraba telok Islamic State (IS) aser Taliban napronglai security forces aser government installations tem maka arudar.
Taliban puri joko hopta ishika yimti kecha memaki arudar, kechiyong parnok tang Afghan sorkar den yimjung asoshi jembishinütsü atema meranga arudar.
Ajisüaka IS puri anüdoklen aliba yimti Jalalabad aser Afghan yimtiba Kabul taoba ita tem tsüngda kanga atonga maka arudar. Parnoki government ministry tem nungi tenzüker midwife training centre tashi amaker.
Taoba ita IS pur kati pa dak bomb alenoker pa sasa Kabul international airport anasa apok aser iba lendong nung AFP driver Mohammad Akhtar densema nisung 23 pokset.
US aser Afghan sepaitemi ali aser tayimtsü ajanga IS pur tali amakba ajanga parnoki meyiper sorkar aser nüburtem amaker.