Afghan sorkar aser Taliban nati yimjung senden amenba pela agizüker: UNSC

United Nations, July 11 (Agencies): Tawa Afghanistan sorkar aser Taliban telok nati yimjung nung alitsü asoshi tsüngdong ajurutepa senden amenba atema pela agizükba olen ka United Nations Security Council (UNSC)-i tanü Honibar nü metetdaktsüogo.

“Afghan tensa tajungba kümdaktsütsü asoshi Pakistan, China aser US sorkartemi nungdakba maparen inyakba atema kanga pelar. Ano, Afghanistan-ia peisasa ayonga Taliban telok den yimjung nung alitsü senden amenba ajanga par linük indang tensa tajungba kümdaktsütsü asoshi maneni ajungshir,” ta züngsem 15 densemba UNSC-i ashi.

Par telokisa ashiba agi, Afghan sorkar aser Taliban telok nati tan July 7 nü Pakistan nung yimjung senden amenba ajanga telok anapronglai kati ka dak temulung lemteta küma tarutsü mapang nung yimjung tezüngzüktep agitsü lenmang apir lir.

Ano, linük ka nung yimji yimjung alitsüren nung tetsürtemi tongti shilem agir ta shia, tetsürtem nema sabang ajunga nung tongti shilem agidaktsütsü asoshi Afghan sorkar ajungshir ta UNSC-i ashi.

Afghanistan-i yimji yimjung nung alitsü, sorkar anemertem den sentaktepshitsü, democracy inyakyim benshitsü aser terenlok alitsü asoshi agiba mera ajunga nung par tentet-ia Afghan sorkar maneni nungita yaritsü melunga aliba olena UNSC-i metetdaktsü.