Afghan Taliban lennir tepsetba atema Pak-i US aitsür

Islamabad, May 22 (Agencies): US-i Pakistan litsü nung Afghan Taliban tanishir Mullah Akhtar Mansour tepsettsü atema drone amshiba asoshi Deobarnü Pakistan-i US aitsüogo.
Yashi US drone strike ka nung Mansour tepset. Afghan arrtsü anasa aliba Baluchistan province nung US Special Operations-i Mansour aser tanga kiralongrar ka unmanned drones aika amshia amak. Tenaji gari ka nung mener Ahmad Wal jila anasa lia amak.
Deobarnü Pakistan Foreign Office-i sangdong ka nung US-i Afghan Taliban lennir Mullah Akhter Mansoor tepsetba osangji drone strike sülen ang metetdaktsü, ta aitsüogo.
“Drone strike sülen ang osangji Prime Minister aser Chief of Army Staff nem metetdaktsü. Iba drone strike ya linük temeten anema inyakba mapa ka lir ta Pakistan-i maneni metetdaktsür. Taoba mapangtem nunga United States den iba kasa onük onoki benokogo,” ta Foreign Office sangdong nungsa shia lir.
Tang tashi nung osang angazükba agi, May 21 nü Taftan arrtsü adena Wali Muhammad ta ser nisung ka Pakistan lushii aru. Pai Pakistani passport ka bena liasü aser ID Card ka bena liasü. Pa indang passport nung Iran nunger visa ka liasü aser Taftan nungi hire asüba gari ka nung pa mena liasü. Iba gariji Pakistan-Afghanistan arrtsü anasa Kochaki nung raksar aliba nguogo, ta Foreign Office-isa metetdaktsü.
Gari anisangji Muhammad Azam ta jangjaogo aser tanabuba tasümangji jangjatsü atema kulitem bendendar, ta parnokisa shisem.
2013 küm Afghan Taliban lennir Mullah Mohammad Omar Pakistan nung asüba sülen, July 2015 nungi Mullah Akhtar Mansour-i iba menden melenzüka inyaka liasü.