Afghan Taliban teloki lenir tasen shimmer

Kabul, May 25 (Agencies): Afghanistan nung tentetba Taliban telungpur teloki par lenir tasenba shimba osang ka tanü, Bodbar nü metetdaktsüogo.

Taoba Taliban lenisang, Mullah Akhtar Mansour melenzüka par lenisang menden bendaktsütsü asoshi Taliban teloki Haibatullah Akhundzada shimba osang sangoktsüogo.

Haibatullah ya Mansour kübok anidakba lenirtem rong nung densemba osang angazükogo.

US-i par drone tayimtsü amshia, Pakistan kübok Balochistan nung Mansour taoba hopta tepset aser iba yongji, Taliban teloki tan par lenisang tasen shimer lir.

Haibatullah den yariteptsü asoshi taoba küm ishika tsüngda  Kabul nung bomb lendong kanga sashia atalokdaktsür Haqqani telok lenisang, Sirajuddin Haqqani aser Taliban telok tentetsang, Mullah Mohammad Yaqoob jabaso, Mullah Mohammad Omar na shimba osanga par teloki metetdaktsüogo.

Taliban telok lenirtemi  Shura senden amenba sülen Haibatullah par lenisang asütsü asoshi shimba osang jangjaogo.

“Shura züngsema ajungai Sheikh Haibatullah pusema nungitsü nangzükogo. Nübur ajungai Emir-al-Momineen tasenbai agütsüba ozüng benshitsü sangdonger,” ta Taliban teloki sangoktsü.

Afghanistan anülulentip tsütsülen, Kandahar nung alir Noorzai nunger Haibatullah ya arishi küm 60 shi tain aliba osanga jangjaogo.