Afghan-Taliban yimjung senden tanaben ayongtsü bilemer: Sharif

Islamabad, October 10 (Agencies): Afghanistan sorkar aser Taliban telungpur telok na tsüngda jembipeter tang anendaka aliba yimjung nung alitsü senden maneni ayongtsü sentong aliba osang ka Pakistan Ato Kilonser, Nawaz Sharif-i tanü Honibar nü metetdaktsüogo.
Taliban teloki taoba küm 14 tejaklen nungi tenzüka Afghan sorkar anema raratsü tenzükba ajanga nüburtem nem lendong tulu bener arutsüba den külemi, tensa mejungi kümdaktsübaren agientsütsü nükjidong nung par telok ana tsüngda tanaben yimjung senden mendaktsütsü sentong renemba osangji Sharif-i tanü televison ajanga metetdaktsü.
Pakistan sorkari ayonger külen taküm July ita nungtu Afghan sorkar aser Taliban telok na tsüngda yimjung senden ka amen saka Taliban telok lenisang, Mullah Mohammad Omar küm 2 tejaklen asüba osang alima dang sangoktsüba sülen par telok nati renemba tanabuba senden asangsang nung mementetsüsa aküm.
Yamaji atalokba sülen, Taliban teloki Afghanistan anüdoklentip tsütsü Kunduz yimti tashiyim agi agiba ajanga Afghan Tir, Ashraf Ghani-i aniba sorkar nem maktsü tulu bener aruja par telok ana tsüngda tensa mejungi kümdaktsüba osang bushiteta lir.