Afghan tir election nung Ashraf Ghani-i takok angu

Kabul, Tsüklai/Feb. 18 (Agencies): 2019 küm September 28 nü Afghanistan nung tir atema election agiba osang election commission ajanga Mongulbarnü sangdongba nung Ashraf Ghani-i kümsük tanabuba inyaktsü jangjaogo. “Ashraf Ghani, shibai vote shilem 50.64 angu, pa Afghanistan tir asütsü election commission ajanga sangdonger,” ta election commission chief Hawa Alam Nuristani-i Kabul nung osangbener senden ka nung ashi.
“Afghanistan nübur tenzükba nung Tsüngremi pa yariangma… Aser asen linüki yimjung arutsü asoshi ni sarasademer,” ta lai ashi. Takok angutsü mechi Ghani-i tasa tamajung yanglua inyaki, ta pa den tokteper aser Afghanistan Chief Executive, Abdullah Abdullah-i tai tongloktsüba ajanga iba osang ita pongu jungnüa mesangdongi arur tanaben züngshitsüsa aküm.
US sepaitem Afghanistan nungi anir aotsü aser iba melen Taliban-i linük nung azüdokshi anentsü aser Afghan sorkar den yimjung ken o jembitsü asoshi lenmang bushiba mapang election osang menua mesangdongi aliba ajanga linük yimten tebilemtsü tamajungba küma ao.
Sentong ajak shidak inyaka ora Afghanistan tarutsü indang lemtetba nung Taliban den Ghani amentsü. Hopta tetenzüklen Abdullah’er teloki ochimashi osang magizüktsü, ta shia lir.
Afghanistan nung tang vice-president inyaksang aser Abdullah tembar, Abdul Rashid Dostum-ia election osang taila sangdongra sorkar balaka tentettsü, ta amokmerena sangdong ka agüja lir. 2014 küm election agiba mapang Abdullah-i Ghani makok aser US tetsüngdai aita tena tsüngda tashi lemsatsü.
Mezüng vote million 2.7 agütsüba nungi tim masüba maparen inyakba ajanga vote million ka jungnüa magi aser vote million 1.8 dang azüng. Afghanistan nung nütsüng yongsük million 35 shi alitsü südi ta asadangteta lir aser item rongnung vote agütsür million 9.6 lir.