Afghan Tir, Ghani-i Pak lenir, Sartaj Aziz den ajurutep

Islamabad, September 05 (Agencies): Afghanistan Tir, Ashraf Ghani aser Pakistan national security advisor, Sartaj Aziz nati Kabul yimti nung yashi Hokolbar nü ajurutepa senden amenba osang jangjaogo.

Par linük ana tsüngda adokba kiralongrar den sentakba mangatettep ken o bentettsü aser Afghanistan sorkar o Taliban telungpur na tsüngda yimjung tezüngzüktep takok ngua agitsü lenmang bushitsü nükjidong nung lenir anati yashi ajurutepa liasü.

Ajisüaka, 6 buba Regional Economic Cooperation Conference (RECCA) senden tezülen Ghani aser Aziz nati yashi senden amenba sülen telemtetba agiba den sentakba osang kata alima dang memetetdaktsüi lir.

Par lenir anati yashi minute 90 shi agia senden amenba osang ka Pakistan sorkaria metetdaktsü saka tenati agiba telemtetba den sentakba osangbo memetetdaktsü.

Pakistan-i par lushi nung tesep tenteta Afghanistan nem lendong bener arutsüba Taliban aser Haqqani network den sentaktepba telungpur anema merarar ta shia, Afghanistan-i Pakistan aija lir.

“Ozü Afghanistan-i Pakistan nungi teyari agia telungpurtem den yimjung nung alitsü maparen tenzüka lir,” ta Aziz den senden amenba sülen Ghani-i RECCA senden nung shilem agidang metetdaktsü.

Ajisüaka, telungpurtem den yimjung tezüngzüktep agitsü maparen nung tetsükdakba ajurutsü ta shia, “Pakistan-i yimji yimjung bener arutsütsü o jembir saka par sorkari par lushi nung tesep tenteta aliba Afghanistan anemertem mazüokteti lir,” ta pai ashi.

Pakistan-i ayonger külen Afghanistan sorkar aser Taliban telok na tsüngda yimjung nung alitsü senden ka taküm July ita amen saka Taliban lenisang, Mullah Omar küm 2 tejaklen asüba osang jangjaba sülen par telok anati July ita 31 nü amentsü renemba tanabuba yimjung senden mementettsüsa akümba osang jangjaogo.

“Tetsükdakba balala ajuruaka, ozü Afghanistan aser Pakistan naprongla ajangzüktsüsa tarutsü mapang nung yimji yimjung tia bener arutsütsü tamang akar,” ta Ghani-i sangoktsü.