Afghan yimjung senden taruba hopta amentsü akok: Pak

Pakistan Ato Kilonser, Nawaz Sharif (Tiyongtsü, achijilen)-i Afghanistan Tir, Ashraf Ghani Rawalpindi kübok Nur Khan tayimtsü anendak pela agizükba noksa nung angur. (Rawalpindi, December 09)

Islamabad, December 09 (Agencies): Taruba hopta nungi tenzüka Afghanistan sorkar aser Taliban telungpur telok na tsüngda yimjung senden tanaben amen tenzükshitsü akok ta Pakistan sorkar ketdangsertemi tanü Bodbar nü metetdaktsüogo.

“Alima ajungai nungita ayongba sülen taruba hopta nungi tenzüka Afghanistan sorkar aser Taliban telungpur telok na tsüngda taoba mapang anendaka ayuba yimjung senden tanaben menshitsü akok,” ta parnoki ashi.

Ajisüaka, “Pakistan o Afghanistan na tsüngda temulung melemtep tulu lir,” ta shia, tan amentsü renemba yimjung senden nung alimai par tetendangertem yoka senden amenbaren reprangshia tendangtsü olen ka Pakistan sorkaria metetdaktsüogo.

Pakistan Ato Kilonser, Nawaz Sharif aser Afghanistan Tir, Ashraf Ghani na den külemi, tongti US o China ketdangsertemi aiben ajurutepa senden amenba sülen tan Afghan sorkar aser Taliban telok na tsüngda yimjung senden menshitsü maparen ya tenzüker lir.

Kümshi ayonga amenba Afghanistan den sentakba onüktem benoka jembitepba senden ka parnoki amenba sülen tan telemtetbaji agiogo.

“Ozü Afghan sorkar aser Taliban telok na tsüngda maneni yimjung senden menshia ozü telok ana tsüngda sendaktepshitsü renemogo,” ta Afghan Foreign Minister, Salahuddin Rabbani-ia tanü osang jangjashitsü.

“Taliban telok den amentsü asoshi tan ayongba yimjung senden aser sorkar o Taliban telok na tsüngda sentaktepshitsü maparen nung ozü Afghanistan nungita yaritsü asoshi US, China aser Pakistan nungeri nangzükogo,” ta pai shisem.

Ajisüaka, Taliban telokibo tang amentsü ayongba yimjung senden nung shilem agitsü mesüra magitsü lemtetba osang tejangja tanü tashi metetdakja mali.

Taoba mapanga Pakistan-i ayonger külen Afghan sorkar aser Taliban telok na tsüngda yimjung senden ka taküm July ita Islamabad nung amen saka Taliban lenisang, Mullah Omar asüba osang angazükba sülen Taliban teloki Afghan sorkar den yimjung senden amentsü memulungi aküm.