Kabul, March 05 (Agencies): Afghanistan, Pakistan, China aser United States nunger densemba linük 4-i aroki ayongba Afghanistan sorkar den yimjung tezüngzüktep agitsü sentong nung par telok madentsü lemtetba osang ka Taliban telungpur teloki tanü, Honibar nü metetdaktsüogo.
US-i aniba alima teloktep mitkartemi 2001 küm Afghanistan yimsüsü menden nungi tsükdaktsür, Taliban teloki West-i nungitba Afghanistan sorkar atsüngdoker Afghanistan ajunga nung Islamic ozüng benoktsü nükjidong nung Afghan sorkar den tongpang kanga sashia teraradak lir.
Quadrilateral Coordination Group (QCG) ta ajaba Afghanistan, Pakistan, China aser United States linüktem nungi ketdangsertemi taoba February ita Kabul yimti nung ajurutepa 4 benbuba senden amenba sülen Afghan sorkar aser Taliban telok na tsüngda tan March ita tetenzüklen nungi tenzüka yimjung nung alitsü senden amentsü ayonga lir.
Ajisüaka, Pakistan kübok Islamabad nung amentsü ayongba yimjung senden nung madentsü lemtetba osang ka peisasa Islamic Emirate of Afghanistan (IEA) ta ajaba Taliban teloki yimdak nung metetdaktsüogo.
“Ozü teloki QCG teloki ayongba yimjung senden nung shilem agitsü tebilemba yua mali ta alima dang sangdonger. Iba senden nung adentsü asoshi ozü IEA lenisangi shinga nema temeten agüja mali. US densema, alima teloktep mitkar ajunga Afghanistan nungi manitet tashi ozü teloki Afghan sorkar den yimjung senden mamentsü ta nenshia metetdaktsür,” ta Taliban teloki sangoktsü.
Par telok tentetsang, Mullah Mohammed Omar küm 2 shi tejaklen asüba osang jangjaba sülenbo Taliban teloki Kabul den yimjung senden mamentsü lemteta lir.
You must be logged in to post a comment Login