Afghan yimtiba nung nisung asem pokset

Kabul, Metsüremi 17 (Agencies) : Tanü Küptoknü Afghan yimtiba Kabul nung Taliban telungpurtemi bomb enoka bener yokba gari tila ka poklokja amakdang nisung asem pokset aser ana yiruogo; ketdangsertemi ashiba agi, tawa yimti nung tashiyim maparen nokdangtsü atema sepaitem tesashiba yoka liaka, bendanglen nungi aruba ‘contractor company’ ka amaktsü nükjidong nung parnoki iba tashiyim maparenji inyak.
Interior ministry nung otongdar, Najib Danesh-i ashiba agi, iba bomb lendong nung asürtem aser yirurtem ajakji civiliantem dang liasü; tia junga contractor-temjibo shinga meyiru.
“Taküm samartem ajakji kar kuo mejeper aser kar tsüngsem meyutsürtem dang liasü. Parnok mang merepshia aliba ngua ni kanga dang aoksa,” ta iba lendong atalokba anasa liasüba nisung ka tenüng agi Mohammad Osman-i ashi.
Iba tashiyim maparenji parnoki inyak, ta Taliban telungpurtemi kibur küma metetdaktsüogo.
Parnoki ashiba agibo bendanger indang gari ana poksatsü aser nisung trok nungi ter tsüngda tepset.
Yamala maparenji maneni inyaktsü, ta parnokisa olen ka shisemogo.